Чаз кхьизва

Гьуьрметлу “Лезги газетдин” редакция!

Зи ихтилат чи рикI алай шаир Етим Эминакай я. Адан уьмуьр гьикI туькьуьлдиз ва бахтсуздаказ фе­найтIа, адан шиирар кIелайла (“Веси”, “Бахтсузвал”, “Шеда зун”) гуьзгуьдай хьиз аквазва.

1966-йисуз Етим Эминан хуьр Ялцугъар арандиз, КIварчагърин “Коммуна” совхоздин Аламише тIвар алай чилел куьчарна, хуьрелни Аламише тIвар эцигна. Иниз мад 5 хуьр куьч хьана. “Коммуна” сов­хоздин “отделение” тешкилна.

Совхоздин малар гьар йисуз дагъдиз — Ялцугърал хутахзавай. Ана малариз тевлени эцигна, экверни хкидайвал хьана. Са нин ятIа­ни гафуниз килигна, эквер хкун ­акъваз хьана.

Са шумуд йисалай Аламишедикай кьилди совхоз тешкилна, тIварни «Аламишинский» хьана. Гилани малар гьар йисуз гьа Ялцугърал акъуд хъийизвай. ЦIийи совхозди Ялцугърал эквер тухудай планар яна. Мад са тIимил вахт фейила, эквер хкун, вучиз ятIани, акъваз хьана.

Са гьихьтин ятIани себеб аваз, хуьрел Эминан тIвар эцигиз тежез, хейлин йисар фенай. Гуя адан тIвар эцигайтIа, хуьр кесиб жеда лугьуз. Эхирни, 2006-йисуз хуьруьз Эминхуьр тIвар гана. Амма хуьр кесиб хьанач. Акси яз, са бязибурун гьаятра 2-3 машинар, кIвалерин къавариз, шифер алудиз, ракьар — чере­пицаяр язава.

Са бязибуру куьгьне кIвалер чукIуриз, цIалцIам къванерикай цIийибур эциг хъийизва.

Лезги халкьдин рикI алай шаир СтIал Сулейманни кесиб лежбер инсан тир. Бес район кесиб хьанани? Акси яз йисалай-суз гуьрчег ва берекатлу жезва! КIанзавайди райондихъ, халкьдихъ рикI кудай регьбер я.

Эминхуьре Етим Эминаз музей ачухнава. Апрелдин вацра райондин телевиденидай  ам къалурна. Аниз райондин са школадин ученикар ва муаллимар атанвай. Валлагь, музей акурла заз регъуь хьана. Са бязибуру чпин къазариз, белки, гьа ихьтин демекар эцигзава. Бес Етим Эмин гьахьтин чкадиз лайих авай шаир яни?

Ялцугъар элкъвена кьунвай вири хуьрера эквер ава. Къвалав гвай Ци­цIезни са кьегьал мерд хци — Амаханов Эмирбега вичин харжидихъ эквер хкизва. ГьинватIани сагърай чеб гьахьтин мерд, ачух рикIе­рин рухваяр!

ЦицIяй Ялцугърал авайди 500 метр я. Вири къунши хуьрера эквер аваз, тек са Ялцугърин хуьр эк­вер авачиз амукьун — им Етим Эминаз ийизвай “гьуьрмет” ятIа?..

Ялцугърал эквер хкайтIа, са шакни алачиз, хуьрел чан хкведа.

Им рикIин гьарай я. Чи ван къведай ксар майдандиз акъатзавач…

Мад са теклиф: эгер Ялцугърал эквер хкайтIа, Етим Эминан кIвал алай чкадал адаз кIвал-музейни ачухиз жедай. Гьар йисуз аниз адан шииратдал рикI алайбур ва школьникарни экскурсиядиз къвез-хъфиз, адан сурал фена, цуьквер эцигиз хьанайтIа, им чIехи шаирди чаз ядигар яз тунвай ирсиниз ва адан руьгьдиз гьуьрмет авун жедачирни.

Гьуьрметлу “Лезги газет”  кIел­завай зи лезги халкь! За квевай куь фикирар гьикI ятIа кхьин тIалабзава.

Мирзехан Рамазанов, Эминхуьр