Эйзудин Сайдумован — 70 йис
Сайдумов фамилияди чи рикIел гьасятда лезги милли сегьнедин устад Абдулкъадир Сайдумовичан тIвар, къамат, руьгь гъизва.
Ихьтин касдин патав мад са Сайдумов чIехи хьун дуьшуьшдин кар яни? Эйзудин Абдулкъадиран стхадин хва я. ДаркIуш-Къазмайрин юкьван школадин муаллим-биолог. Ада хуьре мектеб, Махачкъалада ДГУ-дин биологиядин факультет акьалтIарна, хтана, вичин хуьре акьалтзавай несилриз дерин чирвилер, михьи тербия, чун элкъуьрна кьунвай тIебиатдин сирер чириз 40 йисалай гзаф вахт алатнава.
Ада тарс гайи гзаф аялрикай гила ватандинни виждандин, чи тIебиатдин девлетрин, абур хуьнин ва артмишунин къайгъударар хьанва.
Э. Демирбеговича хуьруьн, райондин, республикадин тешкилатрин векилрин патай гьуьрмет ва авторитет къазанмишнава. Ам РФ-дин журналистрин Союздин, Лезги писателрин Союздин член, “Куьредин ярар” тешкилатдин активный векилрикай сад я. Адахъ райадминистрацияди, РД-дин образованидин ва илимдин министерстводи ганвай шабагьар ава.
Чаз ам халисан ватандаш, Эминан ирсинал дериндай ашукь шаир, чи газетдин вафалу амадаг яз чида. Ада сифтебурукай сад яз бубайрин куьгьне хуьре вичин кIвал эхцигна, аниз булахдин яд хкана, вичин хсуси майишат (хъархъун къелемар битмишардай) арадал гъана. Гьа хуьре, вичин кIвале, “Лезги газетдин” подшивкаяр хуьзва, газетдин амадагар патал илифдай, ял ядай, яратмишдай шартIар арадал гъанва.
Эколог яз, “Лезги газетдиз” ада тIебиат хуьнин месэлайрай гзаф кхьизва, редакцияди адан зегьмет Гьуьрметдин грамота ва махсус премия гуналди къейдна.
Эйзудинан чешнеди руьгьламишнавай гзаф даркIушвийри куьгьне хуьрел чан хкун патал хейлин крарик кьил кутунва. Гьа хуьре “Миресрин югъ” сувар тешкилун гила адет хьанва.
Эйзудинан кIвал алай чкадилай куьгьне Ялцугърин хуьр, ана Эминан кIвалер хьайи чка гъилин капал алайди хьиз аквазва. За кьатIайвал, Эйзудин Сайдумова Эминаз гьакьван шиирар, чIехи поэма, ктаб бахт авун ихьтин тIебии мукьвавилихъ галаз алакъалу я.
Эйзудин Демирбегович Сайдумован 70 йис тамам жезва. Чна адаз и вакъиа рикIин сидкьидай мубаракзава.
Вун хьтин хва чаз багъишай
ДаркIушар сагърай!
Илгьамдинни муьгьуьббатдин
КукIушар сагърай!
Къелемдин женг са чIавузни
Тахьурай зайиф!
Хайи чилин мублагьвилин
Ийиз хьухь тариф!
“Лезги газетдин”
редакциядин коллектив.
