Фадлай йифен кьулар хьанва, вири кIвалера эквер хкахьнава, вири хуьр дерин ахварава, анжах тек са утагъда лампадин экуьни геждалди кIвал ишигълаван авун давамарзава. Кхьинар ийизвай столдихъ, кьил винелди тийиз, Шемсият Хужаевна нубатдин тарсуниз гьазур жезва. Ада гьар са делилдиз фикир гузва: пакадин йикъан гьар са тарс гьикI кьиле тухуда, гьикI тешкилда, ОГЭ-ринни ЕГЭ-рин гьи материал гьихьтин къайдада аялриз чирда, низ ва гьикI куьмекда, кIвалин кIвалах вуч гуда… Вири и суалриз жавабар жагъайла, ахпа Шемсият Хужаевнади вич пакадин йикъаз гьазур хьанвайдай кьазва. Гьа икI саки 40 йисуз.
Чешнелу муаллим — ибур акатай гьи муаллимдиз хьайитIани хас гафар туш, я муаллимриз гузвай лайихлу тIварарни туш. Абур анжах къастуналди, намуслудаказ кIвалахуналди, жемятдиз хийир гъуналди къазанмишзавай баркаллувал я.
Шемсият Хужаевна Бахишевади (Жафаровади) Къурушрин хуьруьн Якьуб Эскендарован тIварцIихъ галай 2-нумрадин юкьван мектебдин урус чIаланни литературадин муаллим яз мектебдиз сифте къадам къачурдалай кьулухъ саки яхцIур йис алатнава. Къенин йикъалди ада гьар юкъуз акьалтзавай несилдиз чирвилерни тербия гузва.
— Шемсият Хужаевна вичин къастунал кIеви, сифтени-сифте вичивай, ахпа амайбурувай гьахълу истемишунардай, гьар са кар-кеспи гъиляй къведай, кьил кутур кIвалах кьилиз акъуддай, жемятдин патай еке гьуьрмет къазанмишнавай муаллим я. Ада гузвай тарсарин ери неинки мектебдин муаллимри, аялри, диде-бубайри, гьакIни республикадин образованидин министерстводи, Хасавюрт райондин образованидин управленидин кьилин пешекарри къейднава, адан кIвалахдиз еке къимет ганва, — лугьузва кIвалахдин рекьяй юлдаш, мектебдин чирвилерин рекьяй завуч, Дагъустандин лайихлу муаллим Агьмед Эмирасланова.
Кьилин категориядин тежрибалу муаллим вичин пешедив рикI гваз эгечIзава, аялар хъсанбурузни писбуруз пайзавач. Ада гьар са тарс виликандалай тафаватлу жедайвал, аялрик ашкъи кутадайвал тухузва.
Ада адетдинбур тушир жуьредин тарсарни тухузва: тарс-лекция, тарс-сиясат, тарс-зачет. Вичиз лезги эдебиятдикайни медениятдикай дерин чирвилер авайвиляй, Шемсият муаллимди урус литературадин тарсар тарихдин ва лезги литературадин тарсарихъ галаз алакъада аваз тешкилзава. Ихьтин къайдади аялриз, са шакни алачиз, еке куьмек гузва.
Шемсият Хужаевнади мектебдин урус чIаланни литературадин муаллимрин методикадин кIватIалдиз регьбервал гуз 20 йисав агакьнава. Анал ЕГЭ-риз, ОГЭ-риз гьазур хьунин месэлаяр веревирдзава, жегьил муаллимриз куьмекдин гъил яргъи ийизва. Дагъустандин лайихлу муаллим, РФ-дин умуми образованидин гьуьрметлу работник Шемсият Хужаевна Хасавюрт райондин образованидин управленида лап хъсан муаллим-новатор яз машгьур я. Адаз семинарра, конференцийра иштиракун теклифзава, ада маса хуьрерин мектебра «мастер-классар» кьиле тухузва. Ада чирвилер гузвай аялри гьам районда, гьамни меркезда кьиле тухузвай олимпиадайра иштиракзава, кIвенкIвечи чкаяр кьазва. Шемсият Бахишевади тарс гайи цIудралди аялри Россиядин гьар жуьре шегьерра, вузар акьалтIарна, жавабдар къуллугърал кIвалахзава.
Ш. Бахишевади жемиятдин крарани активнидаказ иштиракзава. Терроризмдизни экстремизмдиз акси яз кьиле тухвай «Дагъустандин дидеяр» форумдал ада еке доклад авуна. Са шумуд сеферда Хасавюрт райондин администрацияда кьиле тухвай конференцийрал хуьре аялрин бахча авачирдакай ва маса татугайвилерикай рахана.
Алай вахтунда Шемсият Хужаевнади 2-нумрадин юкьван мектебда тербиядин рекьяй директордин заместителвиле кIвалахзава. Мектебда СВО-да иштиракзавай хуьруьн жегьилрихъ галаз мукьвал-мукьвал гуьруьшар тухузва, акьалтзавай жегьил несилдиз ватанпересвилин тербия гузва. Алай вахтунда хуьре Ватандин ЧIехи дяведин иштиракчийрикай касни амачтIани, абурун игитвилерикай мукьвал-мукьвал суьгьбетар ийизва. Ихьтин тербия гузвайвиляй алай вахтунда СВО-да саки вад виш касдив агакьна Къурушрин жегьилри иштиракзава. Ватанпересвилин месэлайрикай мярекатар тухудайла ада гьамиша Н. Островскийди «Гьулдан гьикI лигим хьана?» романда уьмуьрдиз ганвай къиметдин гафар тикрарда.
Шемсият ва Муледин Бахишеврин хизанда кьуд велед ава: пуд хвани са руш. Рустамани Фарида военный университетар акьалтIарна. Алай вахтунда майордин дережадив агакьнавай Рустама са частуна финансрин начальник яз, капитан Фарида МО-дин векилханада къуллугъзава, гъвечIи хва Физулиди ДГУ-дин математикадин факультетда 3-курсуна кIелзава, руш Сарая гьа вичи кIвалахзавай мектебда ЭВМ-дин оператор я.
Вахъ мадни еке агалкьунар ва чандин сагъвал хьурай, гьуьрметлу Шемсият Хужаевна!
Гь. Къазиев,
Дагъустандин лайихлу муаллим
