28-мартдиз Санкт-Петербургда, Приморский проспектда авай «Лахта Холл» комплексда, спортдин уьмуьрдин тарихда кьетIен вакъиа кьиле фида. Россияда пешекарвилин муай-тайдай ачухдай цIийи лигадин (ОЛИМПБЕТ Муай-тай Российская серия) 1-турнир тешкилда. Ихьтин камуни спортдин и жуьре вилик тухуниз хьиз, гьакI адал машгъул ксар патални цIийи мумкинвилер ачухдайдал шак алач. И турнирда чи машгьур спортсмен Жабар Аскерован бягьсни жеда. Амма са акьван шад тушир хабарни ава: чи ватанэгьлиди идалди вичин спортдин рехъ акьалтIарунин къарар кьабулнава.
Россиядин муай-тайдай хкянавай милли командади гьевескаррин арада дуьньядин чемпионатра еке гъалибвилер къазанмишиз са шумуд йисар я. ЦIийиз ачухзавай лига бажарагълу чи тайбоксёрриз чпин устадвал ва алакьунар къалурдай, гьакIни дуьньядин дережадин пагьливанар кьабулдай хъсан майдандиз элкъведа.
Турнирдин сергьятра аваз WMC-дин версиядалди муай-тайдай пешекаррин арада Европадин чемпион Жабар Аскерова — эхиримжи цIуд йисуз тайбоксёррин арада чIехи агалкьунар къазанмишиз алакьнавай чи машгьур ватанэгьлиди — кьисас вахчудай бягьс (бой-реванш) кьиле тухуни, ам мадни яргъалди рикIел аламукьдайди, спортдин и жуьредал рикI алайбурун руьгь тухардайди хьун гуьзлемишзава.
Рагнеда Рамалданова
