Ватандин ЧIехи дяведин ветеранриз, далу патан зегьметчийриз, алай вахтунда Яракьлу Къуватра къуллугъзавай аскерриз, республикадин вири агьалийриз пак сувар — Ватандин ЧIехи дяведа къазанмишай Гъалибвилин Югъ — рикIин сидкьидай мубаракзава!
Гъалибвилин югъ чун патал виридалайни багьа ва чими сувар я. Гъалибвилихъ рехъ яргъалди ва четинди тир. Гьавиляй Ватандин ЧIехи дяведин йисара вири халкьди къалурай гьунарлувал зурбади я. Ам уьлкведин тарихда лап виниз тир ватанпересвилин ва игитвилин, халкьарин садвилин ва тупламишвилин лишан хьиз гьатнава.
Дяведин гьа сифте йикъарилай эхирдалди Дагъустандин 180 агъзурдав агакьна рухвайрини рушари къизгъин женгер кьиле физвай майданра уьтквемвал, жуьрэтлувал къалурна, Гъалибвилин югъ мукьвал авуна. Советрин Союздин ва Россиядин Игитвилин тIварариз — 62 кьегьал, 8 кас — Баркалладин пуд ордендизни, 10 агъзурдав агакьна дагъустанвияр орденриз ва медалриз лайихлу хьана. 80 агъзурдалай гзаф аскерар женгерин майданрай хтанач.
Ватандин ЧIехи дяведин иштиракчийри къазанмишай Гъалибвал чи халкьдин дамах я. Ам чна садрани рикIелай алуддач. Гьа са вахтунда ам чапхунчивилин фикирар кьилевайбуруз кIевелай тагькимарунни я. Къе чи уьлкведин Президент Владимир Владимирович Путина тухузвай сиясатдин нетижада чIехи пай агьалийри Россиядал дамахзава. Заз къе чи ветеранриз им Куь лайихлувал я лугьуз кIанзава.
Гъалибчийрин несилрин игитвилери ва уьмуьрди аялар, хтулар ва птулар чи уьлкведин хатасузвал хуьз, ада мадни цуьк акъуддайвал, абаддайвал зегьмет чIугунал рикI алаз вердишарзава.
Къе чна уьлкведин азадвал ва аслу туширвал патал чанар къурбанд авур аскерриз, юкь агъузна, икрамзава, чна дяведин йисарин четинвилериз дурум гайи фронтовикар, далу патан зегьметчияр рикIел хкизва.
Виридахъ мягькем сагъламвал, ислягьвал, Россиядин ва Дагъустандин абадвал патал чIугвазвай зегьметда агалкьунар ва хушбахтвал хьурай.
Дагъустан Республикадин Кьилин везифаяр вахтуналди тамамарзавай В.Васильев
