8-ноябрдиз Дагъустандин Кьил Владимир Васильев Кьурагь райондиз мугьманвилиз фена. Ина ада районда Россия­дин ОМВД-дин дараматрин комплекс ачухуниз талукь  шадвилин мярекатда иштиракна. Идан гьакъиндай “Лезги газетдиз” РД-дин Кьилин ва Гьуку­матдин Администрациядин пресс-къуллугъди хабар гана.

Мярекатда РД-дин къенепатан крарин министр Абдурашид Мегьамедова, Рос­гвардиядин РД-да авай Управленидин начальник Мегьамед Баачилова ва жавабдар къуллугърал алай маса ксари иштиракна.

Мярекат ачухай Абдурашид Мегьамедова кIватI хьанвай вирибуруз и лишанлу ва­къиа мубаракна ва комплекс арадал гъу­нихъ галаз алакъалу ксариз сагърай лагьана.

КIватI хьанвайбур тебрик авуналди ва полициядин чкадин отделенидин къуллугъчийриз гьуьрмет ийизвайди къалу­руналди, Владимир Васильева вичин уьмуьр­­дин виридалайни чIехи пай къа­нун­-къайда хуьдай органрин къурулушда­ къуллугъ авуниз бахш авурди къейдна.

Идалайни гъейри, региондин руководителди къад йис идалай вилик Дагъустандиз международный бандитрин кIере­тIар сухулмиш хьайи чIавуз арадал атай  вакъиаяр рикIел хкана, а вакъиайри халкь мадни тупламиш хьунал гъайиди къейдна: “Гьина аваз хьайитIани, виридалайни четин макъамра чун халкьди къутармишайди я, чун адан гъавурда акьаз хьана. Халкьдихъ галаз сад тир чIавара чал садавайни тIем гъиз хьайиди туш. Халкь ми­лициядихъ галаз къуьн-къуьне аваз фе­на. Аслу туширвал хуьдай чIавуз телефвилер хьанатIани, чна гъалибвал къазанмишна”. РД-дин Кьили гележегдани гьа и саягъда кIвалахун чарасуз тирдакай лагьана.

Гуьгъуьнлай рахай Кьурагь райондин кьил Замир Азизовани кьиле физвай мярекатдин важиблувал къейдна.

“Къенепатан крарин къуллугъчийрихъ галаз санал чна чи райондин агьалийриз яшайишдин къулай шартIар таъминарунихъ элкъуьрнавай кIвалах кьиле тухузва”, — лагьана муниципальный райондин кьили ва цIийи дараматди полициядин къуллугъчийрин кIвалахдин шартIар аква­дайвал хъсанардай мумкинвал гудайдини алава хъувуна.

Мярекат кьиле физвай чIавуз комплекс эцигайбуруз ва РД-дин МВД-дин са жерге къуллугъчийриз министерстводин патай гьуьрметдин грамотаяр ва чухса­гъул­дин чарар гана.

Кьурагь районда мугьманвиле авай чIавуз республикадин руководитель Владимир Васильева мешебеги яз кIва­лахай Россиядин Игит Зейнудин Батманован мемориальный кьулунин  вилик цуьквер эцигна.

Кьегьалвал къалурай дагъустанви рикIел хкуниз талукь мярекатда адан кайвани Жамиля Батмановади, РД-дин къенепатан крарин министр Абдурашид Мегьамедова, Росгвардиядин РД-да авай Управленидин начальник Мегьамед Баачилова,  Кьурагь райондин кьил Замир Азизова ва жавабдар къуллугърал алай маса ксари иштиракна.

Вичин чан къурбанд авуналди, гъве­чIи аял галай хизан боевикрикай къутармишай  дагъустанвидиз телеф хьайида­лай гуьгъуьниз Россиядин Федерациядин Игитвилин тIвар гунин гьакъиндай Указдал Россиядин Федерациядин Президентди 2018-йисан майдиз къул чIу­гунай.

8-ноябрдиз Владимир Васильева Кьурагь райондин администрацияда  му­ниципалитет вилик тухуниз, налогар ва маса харжар кIватIуниз талукь месэладай совещание кьиле тухвана.

Кар алай месэлаяр веревирд авунив эгечIдайла, региондин руководителди са жерге рекьерай тухун лазим тир кIва­лахар яргъал вахтунда республикадин ва муниципалитетдин бюджетдай фи­нансламишун къалурнавачирдал ва пара кIвалахар федеральный такьатрин гьисабдай ийизваз хьайидал фикир желб­на. Идахъ галаз алакъалу яз В.Ва­силь­е­ва чкадин бюджетдиз къвезвай доходрин кьадар артухарунин важиблувал къейдна. Региондин руководителди ма­лу­­марайвал, 2018-йисуз гьукумдин, къа­нун-къайда хуьдай органрин къуллугъчийрин, карчийрин, депутатрин, муниципальный районрин ва шегьеррин округрин саналди тир чалишмишвилерин нетижада налогар кIватIунин дережа 20 процентдин хкажиз алакьна. Гьа и такьат­рин гьисабдай алай вахтунда дагъустанвийрин яшайишдин дережа хкажунихъ элкъуьрнавай хейлин проектар кьилиз акъудзава, къейдна Владимир Васильева.

Республикадин руководителди «100 мектеб» проектни агалкьунралди уьмуьрдиз кечирмишайдакай лагьана. Кьурагь районда  и проектдин сергьятра аваз кьве школа ремонтна, гьа ихьтин кIвалах алай йисузни тухузва. ИкI, “150 мектеб” проектдик муниципалитетдин умуми образованидин 7 идара гьеле кутунва.  Анра эци­гунринни монтаждин кIвалахар кIе­лунрин йис  башламишдалди агалкьунралди акьалтIарна.

Вилик финин мумкинвилерикай рахадай чIавуз Дагъустандин Кьили коммунальный къуллугърай гьакъи вахтунда гунин низамдал амал авуниз эвер га­на. ГьикI хьи, ида газдалди, электроэнергиядалди таъминарунин ери хкаждай мумкинвал гуда.

“Чна гъиле кьунвай кIвалахар дуьзбур я. Чна дагъдиз хкаж хьунин рехъ хкя­­­нава. Ида лагьайтIа, датIана мадни чIе­хи чалишмишвилер авуниз мажбурзава”, — малумарна В.Васильева.

Муниципалитет яшайишдинни экономикадин жигьетдай вилик тухунин, нало­гар кIватIун авай гьалдин, райондихъ и барадай авай мумкинвилер ишлемишунин гьакъиндай муниципалитетдин кьил Замир Азизова суьгьбетна.

“Лезги газет”