Миллетрин арада авай алакъайрин рекьяй Советдин алай йисан 20-июлдиз кьиле фейи заседанидин нетижайрал асаслу яз, Россиядин Президент В.Путина са жерге тапшуругъар ганва. Абурун сиягьда лезгийрин общественностдик ва вири халкьдик секинсузвал кутазвай лап хци месэлайрикай сад тир Самурдин тамун экосистема патал къурхулувал арадал атунихъ галаз алакъалу тапшуругъни ава.
“РФ-дин Гьукуматди Дагъустан Республикадин Гьукуматдихъ галаз санал государстводин тIебиатдин федеральный метлеб авай “Самурский” заказникдин районда гидрогеологиядин жигьетдай арадал атанвай гьалариз алава яз къимет гун ва Дербент шегьер целди таъминарун тешкилунин барадай чеб кьилиз акъудуни тIебиатдин надир комплекс тир Самурдин къадим тамуз чIуру таъсир тийидай теклифар агакьарин”, — лугьузва Россиядин Президентдин официальный сайтда чапнавай документдин текстина.
Президентдин тапшуругъ кьилиз акъудунин патахъай жавабдар ксар яз РФ-дин Премьер-министр Дмитрий Медведев ва РД-дин Гьукуматдин Председатель Абдусамад Гьамидов тайинарнава. И барадай кьабулнавай серенжемрин патахъай абуру алай йисан 1-декабрдалди гьахъ-гьисаб авун герек я.
РикIел хкин, РФ-дин Президентдин патав гвай миллетрин алакъайрин рекьяй Советдин Йошкар-Олада кьиле фейи заседанидал ФЛНКА-дин регьбер Ариф Керимова государстводин кьилиз Дагъустандин Кьиблепата авай, чиликай яд хкуддай имаратар эцигунин проект кьилиз акъудай дуьшуьшда вич экологиядин жигьетдай лап еке хаталувилик акатзавай Самурдин тамун месэла раижна. Ам Азербайжанда аваз хьайи Россиядин Храх-Уба ва Урян-Уба хуьрерай мажбур хьана куьч хьанвайбуруз яшайишдин шартIар тешкилунин месэладални акъвазна.
«Лезги газет»
