“Лезги газетдин” 3-нумрада 2019-йисан 1-январдилай пенсияр хкажуникай малумат акъатайдалай кьулухъ редакциядиз и месэладиз талукь яз зенгер авур ва чарар рекье тур ксарин кьадар гзаф я. Вирида шикаятзава: пул тIимил хкажнава. ИкI, Мегьарамдхуьруьн райондай тир (хуьр къалурнавач), муаллимвиле кIвалахна, алай вахтунда лайихлу пенсияда авай А.Ибрагьимовади, вичин пенсия 1000 манатдин чкадал 640 манатдин хкажнава лугьуз, кхьизва. Сулейман-Стальский райондин Алидхуьрел яшамиш жезвай М.Гьабибовади вичизни, гьа и кьадарда (640 манат) аваз пенсия хкажнавайдакай хабар гузва. Вучиз икI ятIа, газетдивай кьил акъудун, жаваб газетда чап авун тIалабзава. “Зун яргъал йисара шофервиле кIвалахнавай кас я. Алай йисуз зи пенсия 725 манатдин хкаж хьанва. Захъ галаз санал зегьмет чIугур зи дустунин пенсия 1000 манатдин хкажнава. Гьуьрметлу редакция, жечни и месэладай кьил акъудайтIа!?”, — кхьизва Сулейман-Стальский райондин ЦIийихуьряй тир Атлухан Атлуханова ва икI мад…
Гьуьрметлу ватанэгьлияр! Куьне газетдин редакциядихъ галаз алакъа хуьнал чун гзаф шад я. Квек къалабулух кутазвай, чкайрал квез тамам ва дуьз жавабар тагузвай дуьшуьшрикай чаз хабар це! Чун а месэлайрай кьил акъудиз чалишмиш жеда. Амма куьне талукь месэладикай тамам делилар (зегьметдин стаж, СНИЛС, лазим идарайрай квез гайи жавабар ва икI мад) къалур тавурла (винидихъ тIварар кьунвай ксаризни и меслят талукь я), чун кIеве гьатзава.
Алай йисан 1-январдилай пенсийрин кьадар артух хьуниз талукь суалриз чаз Россиядин Пенсийрин Фондунин Дагъустанда авай отделенидай ихьтин жаваб агакьнава:
“2019-йисан 1-январдилай пенсия 1000 манатдин кIвалах тийизвай вири пенсионерриз хкаж хьанвач. И кьадар виридаз сад хьиз талукьди туш. ИкI, садбурун пенсия анжах — 640, муькуьбурун 1000 манатдин ва идалай са тIимил артухни хкаж хьанва. Вучиз икI я? Хкаж хьанвай пулунин кьадар пенсиядин виликдай къачуз хьайи кьадардилай аслу я, гьар са пенсионердиз кьилди тайинарзава. Идалайни гъейри, хкажнавай пулунин кьадар зегьмет чIугвазвай девирда къазанмишнавай пенсиядин ихтиярар (стаж, пенсиядин коэффициентар) гьикьван гзаф яз хьайитIа, индексация кьиле фейи чIавузни гьакьван артух жезва. Мисал яз, эгер 2018-йисан эхирриз кIвалах тийизвай пенсионерди инвалидвиляй къачузвай пенсиядин кьадар 9137 манат тиртIа, индексация кьиле тухвайдалай кьулухъ, яни 2019-йисан 1-январдилай, 644 манатдин хкаж хьанва. Ахьтин пенсионерди алай вахтунда 9781 манат къачуда. Маса мисал. Эгер кIвалах тийизвай пенсионерди алатай йисан эхирриз 15437 манат пенсия къачузвайтIа, цIийи йисалай адаз пенсия 1088 манатдин хкаж, яни 16525 манат хьанва”.
Аквазвайвал, алатай йисан эхирриз гзаф пенсия авай ксариз ам амайбурулай гзаф артухни хьанва. Зоконди гьакI истемишзава.
Россиядин Пенсийрин Фондунин Дагъустанда авай отделенидин пешекарри меслят къалурзавайвал, пенсия дуьз тайинарнавани, авачни ва амай вири суалриз жавабар квевай ПФР-дин сайтдай, районра кардик квай пенсийрин отделенийрай, гьакIни телефондин 8 800 200 17 01 нумрадиз зенгна, чириз жеда.
Гьазурайди — Рагнеда Рамалданова
