Уьлкведин алай аямдин технологийралди кIвалахзавай виридалайни бажарагълу, аудиториядин фикир тамамдаказ желб ийиз ва гьатта виридалайни муракаб материал кьезилдаказ ачухариз алакьдай муаллим “Классная тема” телешоудиз хкяда. Вирироссиядин мулкунал телепроектда иштиракун патал муаллимар хкядай гьерекат башламиш хьанва. Муаллимрикай тир телешоу Россиядин Президент Владимир Путинан тапшуругъдалди “Россия 1” телеканалди ва РФ-дин просвещенидин министерстводи гьазурзава.
“Муаллимдин уьмуьрда гьар са югъ акьалтIай метлеблуди, аламатдинди ва гзаф терефрикай ибаратди я. ЦIийи шоу — им и терефар раиждай ва чи уьлкведин школа неинки виридалайни ерилу чирвилер гузвайди, гьакIни аялрив эгечIунин жигьетдайни виридалайни фад гьиссдайди, къайгъударди яз вучиз гьисабзаватIа аквадай лап хъсан мумкинвал я. Чи муаллимриз раиждай, пайдай хъсан алакьунар ва тежриба ава. Хкягъунин гьерекатда иштиракзавай вирибуруз за бахтуни гъун алхишзава”, — лагьана РФ-дин просвещенидин министр Сергей Кравцова, муаллимрихъ элкъвена.
Телешоуда иштиракун патал арза уьлкведин гьи региондай хьайитIани тир муаллимдивай-предметникдивай гуз жеда. Муаллимди вичикай суьгьбет авун, вичин предметдиз талукь тест вахкун ва вичи тарс тухузвайвал къалурзавай видеовизитка лентиниз къачун лазим я. Уьлкведин майданда кьиле тухузвай и гьерекатда агъадихъ галай тарсар гузвай муаллимривай иштиракиз жеда: математика, химия, биология, география, история, физика, урус чIал ва литература.
“Классная тема” шоуди алай аямдин педагогикадин ва адан виридалайни важиблу паюнин — муаллимрин мумкинвилер ачухарда.
Хкягъунин гьерекатда гъалиб хьайи ва ачухдаказ гайи сесералди вилик акъатай ирид муаллим “Россия 1” телеканалдай къалурдай финалдин шоуда майдандиз экъвечIда, ина абуру гьарда вичин предметдай тарс тухуда. Гъалиб хьайи муаллимдиз кьилин пишкеш — федеральный телеканалда авторвилин передача гуда.
Хкягъунин гьерекатда иштиракун патал арза 10-августдалди “ВКонтакте” приложенидин куьмекдалди гуз жеда, хабар гузва РД-дин образованидин ва илимдин министерстводи.
Чи мухбир
