2018-йисан январдиз Кьурагь райондин ветеранрин Советдин президиумдин член, зегьметдин ветеран  Иса  Гьажиевич  Исаеван  80 йис тамам хьанва. Иса духтур! И тIвар ван тахьай ва ам чин тийидай­ кас  Кьурагь  райондай тек-туьк жагъида. Вичин вири уьмуьрда  халкьдин сагъламвилин къуллугъда акъвазай  кас я. И йикъара чун юбилярдин патав кIвализ фена…

Иса Исаев Кьурагьрин хуьре лежбер хизанда дидедиз хьана. Адан дах Гьажиди сифте колхозар тешкилдайла вичин хсуси 2 яцни са араба колхоздиз вахканай. Адакай Кьурагьрин Микоянан тIварунихъ галай  колхоздин правленидин член, лапагрин бригададин  серкер, МТФ-дин заведующий хьана. Адахъ “Кавказ хуьнай», «Гьакъисагъ зегьметдай» ме­далар авай. Кьурагьрин юкьван школадин 4-класс куьтягьайла Исади Баку ше­­гьердин Шаумянан тIва­ру­нихъ галай 64-нумрадин школада 7-клас­с­дал кьван кIелун давамарна. Хизан­ Бакудай Кьурагьиз куьч хъхьунин себебралди ам мад хуьруьз хтана ва 1956-йисуз Кьурагьрин юкьван школа куьтягьна. 1957-йисуз Дагмединститутдиз гьахьун патал экзаменар вахкана. Урус чIалай, химиядайни физикадай къачуна кIан­завай 15 баллдикай 2 балл кими хьайи ам институтдиз кьабулнач.  Гьа са вахтунда 9 балл къазанмишай ЦIунти райондай тир са абитуриент кьабулна. “Ана кьилин образование авай духтурар авач, Кьурагьрин  азарханада ахьтин пешекарар ава”, лугьудай гафарикай далда кьуна ректорди. Нетижада Иса Исаев Каспийскдин медицинадин училищедиз гьахьна ва 1960- йисуз кIелна куь­тягьна, вичин хушуналди хайи Кьурагь райондиз хтана. Зегьметдин рехъ Сараг, Ругун хуьрерин фельдшервилин пунктунин (ФП) заведующийвиле кIва­ла­ху­нилай башламишна. А вахтарин къайдайралди, гьа са къуллугъдал  тайинарай йикъалай кьулухъ 3 йисуз кIва­лахна кIанза­вай. И йисара  ада а хуьрерин агьалийрин патай еке гьуьрмет къазанмишна. Вири шад мярекатрални ам лап рикI алай мугьман яз кьабулна.

Пуд йис алатайдалай кьулухъ И.Исаева Махачкъала шегьердин, Советрин вахтара тIвар-ван авай,  шуьшедикай чIунар ийидай заводдин рабочияр сагъар хъийидай пунктунин заведующийвиле кIвалахна.

1963-йисуз ам Дагмединститутдиз гьахьна, 1969-йисуз анаг акьал­тIарна, вичин хушуналди хайи райондин азарханадиз терапевт яз кIва­лахиз хтана. 1970-йисуз адаз райвоенкоматдай республикадин военный духтурвиле кIвалахал теклифна. Диде-бубадин яшар хьуниз, абурухъ гелкъведай кас та­хьуниз ки­лигна, адавай аниз физ хьанач. 1972-йисалай, Баку шегьерда рентгенологвилин рекьяй пеше къачурдалай кьулухъ, райондин азарханада рентгенологвиле кIва­лахна. Гьа и йисан сентябрдин вацра Дагмединститутдин ЛОР (оториноларингология) кафедрадин клинический ординатурадиз гьахьна. КIелна куьтягьайла Махачкъаладин 1-нумрадин шегьердин поликлиникада ЛОР духтур яз кIва­лахна. Ина зегьмет чIугвадайла адан патав КПСС-дин Кьурагьа райкомдин 1-секретарь Зейдулагь  Гьамидов атана, Кьурагьиз кIва­лахал хтун меслят къалурна. Гьа пакадин юкъуз адаз республикадин здравоохраненидин гьа чIаван  министр Наби Кураева вичин кабинетдиз эверна, икI лагьана: «Вун гьихьтин духтур ятIа, заз чизва. Амма ви тешкиллувилин ала­кьунрикай заз хабар авач. Куь сад лагьай секретардиз вун тадиз Кьурагьиз хтана кIанзава». Кьурагьрин райбольницадин кьилин духтурвиле тайинарай  приказни вугана, хайи райондиз рекье хтуна.

— А вахтара кадрияр хкягъун ва абур чпин чкайрал  тайинарун лап вини дережада авай. Гила хьиз, вуж гьинал хьайитIани, тайинариз жезвайди тушир, — суьгьбетзава духтурди.

— Райбольница а вахтунда лап чIуру гьалда авай. Адан гьаят вири па­тарихъай ахъа тир. Мал-лапаг, кIва­лин къушар, инихъай-анихъ са манийвални авачиз къекъвезвай. Сифтени-сифте субботникар тешкилуналди азарханадин гьаят, цлар эцигна, кIеви авуна. Ахпа анин гьаятра кIерецин ва маса емишрин къелемар цана, безетмишна. И карда заз сифтегьан партиядин ва комсомолдин организацийри еке куьмекар авунай.Начагъбур патал ял ядай скамейкаяр эцигна. Азархана начагъбур сагъар хъийидай чкадиз ухшар хьана.

КIвалахар йисалай-суз вилик фе­­на. 1985-йис алукьна, низам-къайда терездикай хкатна. Медицинадин къурулушни, амай хилер хьиз, чкIиз башламишна. Зун, арза гана, жуван хушуналди кIвалах­дилай элячIуниз мажбур хьана. 1994-йисалди сифте духтурвиле, гуьгъуьнлай кьилин духтурдин заместителвиле кIвалахна. 1996-йисалай 2002-йисалди ОМС-дин (обязательное медицинское страхование) Кьурагьрин филиалдин директор яз зегьмет чIугуна. И чIавалди кьве миллиондилай виниз взносар тагунин нетижада арадал атай буржар, пеняяр ахлудна, — давамарзава ихтилат Иса Гьажиевича.

Гуьгъуьнлай, 2002-йисалай 2016-йисалди, И.Исаева райбольницада ЛОР духтур яз кIвалахна. И йисара япарин, туьтуьнин ва нерин азарар сагъар хъийиз са начагъдини райондай масаниз фенач.

Алай вахтунда Иса духтур запас­давай медицинадин капитан, Да­гъустан Республикадин здравоохраненидин отличник я. Адаз яргъалди ва гьа­къисагъвилелди зегьмет чIугу­най СССР-дин Верховный Советдин тIварунихъай, 1988-йисан 7-апрелдиз кьабулай Дагъустандин Верховный Советдин къарардалди, «Зегьметдин ветеран » медаль ганва­.

Иса Исаева райондин общест­венно-политический уьмуьрдани активнидаказ иштиракзава. Са шумудра райондин халкьдин депутатрин райсоветдин депутат яз, райондин ва республикадин партиядин  конференцийриз  делегатвиле хкяна. Ада, са бязибуру хьиз, коммунистрин партия маса ганач. Ам къени Ленинан, коммунистрин партиядиз вафалу яз амазма. И рекьяйни ам са кьадар шабагьрин сагьиб я.

Адаз «Кьурагь райондин вилик лайихлувилерай» Гьуьрметдин Грамота ва Знак ганва. Иса Гьажиевича къенин юкъузни, ветеранрин рай­советдин член яз, жегьилрин арада датIана тербиядин кIвалах тухузва, абур дуьз рекье тунин меслятар къалурзава.

Иса духтур Сергокъала хуьряй тир Дагпединститутдин урус чIа­ланни литературадин факультет куьтягьнавай  ПатIимат Гьажиевнадал эвленмиш хьана, интернациональный хизан тешкилна. ПатIимат  муаллимди Кьурагьрин юкьван ва Ма­хачкъаладин школайра яргъал йисара муаллимвиле кIвалахна, зегь­метдин ветеранвилин тIвар къачуна.

Иса духтурдини ПатIимат му­ал­лимди 5 аял (2 гадани 3 руш) хъсан тербия гана, чIехи авуна. Абурун кьве хцизни кьилин образование ава. Малика са шумудра тхэквандодай Россиядин ва Европадин чемпионвилин тIварар къазанмишна. Ам Австралиядин Сидней шегьерда кьиле фейи Олимпиададин къугъунрин хкянавай командадик кутунай, амма 5 агъзур доллар  тахьун себеб яз Маликавай аниз физ хьаначир… Алай вахтунда ам вичин хизан галаз Чехиядин Прага шегьерда яшамиш жезва.

Муькуь хва Мурад Ростовский областдин Сальск шегьерда, 2 руш Махачкъалада, чIехи рушни Кьурагьа яшамиш жезва, ада аптекарвиле кIвалахзава. Иса духтурдихъ 14  хтул ва 3 птул ава, абуру адан рикI шадарзава.

Чна вичин вири уьмуьрда намуслу зегьметдалди, дерин чирвилералди агьалийрин патай еке гьуьрметни авторитет къазанмишнавай Иса духтурдиз юбилей тебрикзава. Чаз адан уьмуьрда гьар са югъ берекатлуди, бегьерлуди, агалкьунринди хьана кIанзава.

“Гьайиф вун кьуьзуь жез, Иса духтур”, — лугьузва адаз районэгьлийри.

Фахрудин Мирзоев