Чи ватанэгьлияр — гьар сана

Дагъустандивай, хайи ерийривай яргъара авай гзафбуру чпин руьгь гьамиша ватанда ава лугьудай ванер чаз мукьвал-мукьвал къведа. Кьисметди акъудзавай чкадилай аслу тушиз, гзаф ватанэгьлияр элкъвена хайи ерийрихъ хкведа, садбуру цIийи кьилелай кIвал-югъ кухтада.

Вичикай ихтилат физвай  Зарина  Маиловна  Тегьмезовадин  диде-бубани Лезгистандай кьисметди Урусатдиз акъудай хизанрикай сад я. Алай вахтунда Москвадин областдин Краснознаменскда яшамиш жезвай Заринадихъ гзаф рекьерай алакьунар ава. Адан буба Ме­гьарамдхуьруьн райондин Оружба хуьряй я, диде — Азадогълидилай.

З.Тегьмезова 1997-йисан 20-августдиз Калугадин областдин Боровск шегьерда дидедиз хьана.

Юкьван мектебдилай гъейри, ада 2007-2011-йисара аялрин искусствойрин мектебдани “Изобразительное искусство” пешедай чирвилер къачуна. И вахтара Зарина каратэдал, спортдин туризмдал машгъул хьана. Каратэдай ам къизилдин зул авай шуьтруь рангунин чIулунин сагьиб я.

2015-йисуз ам “Агроэкологическая оценка земель” пешедай К.А.Ти­мирязеван тIварцIихъ галай Россиядин государстводин аграрный университетдик — МСХА-дик экечI­на. Агрохимикдинни накьвар ахтармишдайдан пеше къачурдалай кьу­лухъ З.Тегьмезовади университетда 2019-2021-йисара “Селекция, генетика и семеноводство” пешедай магистратурадани кIел хъувуна.

Алай вахтунда ада образованидин GeekBrains онлайн платформада “Почвоведение” ва “Агротехника” махсус курсарай тарсар гузва. Илимдин, хкягъай пешедин рекьяй агалкьунралди кIвалаху­нилай гъейри, З.Тегьмезовади яратмишунризни, журналистикадизни еке майилвал ийизва. Гьар са рекьяй алакьунар авай инсан тирди ада краралди субутнава. ТIебиат­дин шикилар чIу­­г­у­нал ва ягъунал адан рикI гзаф ала. Ам художникар­ патал “#ВМЕСТЕ” лишандик квай мергьяматлувилин проект-выставка тешкилайбурукай сад я. Соцсетра ада вичин махсус блогар кьиле тухузва.

Са шумуд вацра ада Smooth StyIe радиода “ИНФО поле” прог­рамма кьиле тухвана. 2019-йисуз ада “Живые системы” музейда ­экскурсоводвиле, гуьгъуьнлай Д.Н.­Пря­нишникован тIварцIихъ галай агрохимиядин ВНИИ-дин инновациядин центрада агрохимиквиле кIвалахна.

“Зи мукьва-кьилийрин чIехи пай Дагъустанда яшамиш жезва, муькуьбуру Россиядин жуьреба-жуьре шегьерра чпин кIвал-югъ кутунва. Садбур кьисметди къецепатан уьлквейриз акъуднава. Захъ кьве вахни ава”, — ихтилатзава вичикай Заринади.

Лезги чIал хъсандиз чир тахьуни адак къалабулух кутазва. Гьа­йиф­дивди къейдзавайвал, виликдай ам Дагъустанда анжах гатун са тIимил йикъара жезвай, яни жуван чIал хъсандиз чирдай мумкинвал жезвачир. “Регъуьвиляй гьа чизвай чIалалди рахадай ашкъини амукьзавачир — танишрини багърийри за гафар сивяй акъудунин тегьердал  хъуьруьнарзавай. Амма чIехибуру гьамиша хайи чIалал рахун герек я лугьузва”, — алава хъийизва ада.

Технология еримлу хьуникди, цIийивилер арадал атуникди За­ринади Телеграм-каналда лезги чIал чирзава, интернетдин маса чешмейрикайни менфят къачузва. Адаз хайи чIал чириз кIанзавай вич хьтин ксар мадни гзаф авайди чир хьана.

З.Тегьмезова эхиримжи йисара Дагъустандиз неинки гатуз, гьакI амай вахтарани, гьар мумкинвал хьайила, хквезва. “Гила зун мугьман ва я турист хьиз ваъ, жуван ватандиз хьиз Дагъустандиз хъфизва. Диде-бубади Дербент шегьерда кIвалерни эцигнава. Чими ва ри­к­I­из хуш Дагъустанда жуван кIвал аваз хьунал за шадвалзава”, — лугьузва ада.

К. Ферзалиев