(Эвел — 2020-йисан 44-52, 2021-йисан 1-7-нумрайра)
Усман халифадин гафар (ва насигьатар):
- Вичин эхиримжи хутIбада Усман халифади (Аллагь рази хьурай вичелай) лагьана: “Гьакъикъатда, Аллагь-Таалади квез дуьнья куьне адалди Эхират къазанмишун патал ганва, Ада квез ам куьне адал юкь вегьин (далу агалдун) патал ганвач. Дугъриданни, дуьнья фана (пуч) жеда ва Эхират гьамишалугъ амукьда. Къуй куьн ада (дуьньядин уьмуьрди) гьамишалугъ амукьдайдал гьич желб тавурай. Гьавиляй куьне фана жедайди туна, амукьдайди хкягъа! Гьакъикъатда, дуьнья куьтягь жеда ва вири Аллагьдин патав хъфида. КичIе хьухь квез Аллагь-Тааладихъай, дугъриданни, Адакай кичIевал хьун Адан гуждикай (жазадикай) хуьн я, ва (Адаз) “мукьвал ийидай карни” я. Аллагьдин патай (квез писвилихъ) еке дегишвилер хьуникай (гунагьрин жаза яз) мукъаятвал ая куьне. (Куьне) куь “мусурманрин жемят” мягькемдиз яхъ, кьилди-кьилди кIапIалар жемир. Къуръанда лагьанва, (3-сура, 103-аят, мана): “РикIел гъваш (куьне) Аллагьди квез гайи (еке) нямет; куьн (сад-садаз) душманар тир ва Ада куь рикIер сад (баришугъ) авуна ва Адан няметдалди (регьимдалди) куьн стхаяр хьана…”. (Тарих атI-ТIабарий).
Кьуд лагьай халифа: Али ибн Абу ТIалиб
(Аллагь рази хьурай вичелай)
Адан тIвар Али ибн Абу ТIалиб ибн Абду-ль-МутIтIалиб ибн Гьашим ибн Абдуманаф ибн Къусай Абу аль-Гьасан аль-Къураший я.
Ада саки вад йисуз (кьуд йисни кIуьд варз) халифадин везифаяр тамамарна: гьижрадин 35-йисалай 40-йисалди (656- 661-йисара).
(КьатI ама)
Ямин Мегьамедов,
диндин рекьяй алим
