Гьуьрметлу газет кIелзавайбур!
Алатай йисуз Махачкъалада “Пак Къуръан ва адан манайрин таржума лезги чIалал” тIвар алаз лезги чIалал Къуръандин аятрин манаяр чапдай акъатнай. Араб чIалай таржума авурди диндин рекьяй алим Ямин гьажи Мегьамедов я.
Къейд ийин хьи, “Пак Къуръан ва адан манайрин таржума лезги чIалал” Урусатдин мусурманрин Духовный управлениди тестикьарнава. Идан гьакъиндай Урусатдин муфтийрин Советдин председатель, шейх Равиль Гайнутдинан ктабдин сифтегьан чинра ганвай тебрикдин гафуни шагьидвалзава.
Шаз гьакIни лезги чIалал “Мугьаммад пайгъамбардин (къуй Аллагьдин патай салават ва саламар хьурай вичиз) уьмуьрдин рехъ” тIвар алай ктабдизни экв акуна. Абур кьведни «Лезги газетдин» редакциядай маса гузва (сад лагьайдан къимет – 1000, кьвед лагьайдан – 500 манат).
Мукьвара мергьяматлу са касди вичин такьатрихъ абурукай хейлин ктабар маса къачуна ва лезги хуьрера авай мектебриз, ктабханайриз, медениятдин маканриз, диндин ктабар кIелиз кIанзавайбуруз паюн тIалабна. И кардихъ галаз алакъалу яз, эгер газет кхьенвайбурун арада и ктабар кIелиз кIандайбур аватIа, абурувай ва гьакIни мектебрин, ктабханайрин векилривай винидихъ тIвар кьур кьве ктабни “Лезги газетдин” редакциядай пулсуз вахчуз жеда.
«Лезги газет»
