24-октябрдиз Дагъустандин Кьил Владимир Васильев кьуршахар кьунин спортдин жуьредай 2018-йисан дуьньядин чемпионатда гъалиб хьайибурухъ, призеррихъ ва тренеррихъ галаз гуьруьшмиш хьана. Идан гьакъиндай «Лезги газетдиз» РД-дин Кьилин ва Гьукуматдин Администрациядин пресс-къуллугъдай хабар гана.
Будапештда 20-октябрдилай 28-октябрдалди кьиле фейи акъажунра хкягъай командадик кваз Дагъустандин азаддиз кьуршахар кьадайбуру къизилдин – 3, гимишдин — 1 ва буьрунждин 2 медаль къазанмишна. Шабагьрин кьадардал гьалтайла, чи спортсменри рекорд эцигнава. Абдулрашид Садулаев, Мегьамедрасул Газимегьамедов ва Завур Угуев дуьньяда лап хъсан пагьливанар яз гьисабнава, Гьажимурад Рашидова кьвед лагьай чка кьунва, Агьмед Чакаевакайни Агьмед Гьажимегьамедовакай буьруьнждин призерар хьанва.
Гуьруьш ачухай РД-дин Кьили кIватI хьанвайбуруз дуьньядин чемпионатда агалкьунар къазанмишун мубаракна: «Куьн чи республикадин дамах я. Са бязибурулай уьмуьрда гьатта садра кьванни алакь тийизвай хьтин гьунарар квекай са бязибуру гьеле кьвед лагьай сеферда къалурнава. И кардай куьн пара сагърай!
Чна пулдин такьатар саламатдиз хуьн ва менфятлудаказ ишлемишун таъминарунин, абур жергедин агьалийрив агакьарунин жигьетдай кIвалахда галай-галайвал къайда твазва».
Региондин руководителди и барадай эхиримжи вахтара гьихьтин агалкьунар къазанмишиз хьанватIа раижна ва гьа и вахтунда бюджетдин кьенятнавай такьатар яшайишдин хилен месэлаяр гьялун, гьа гьисабдай культурадиз ва спортдиз куьмек гун патал чара ийидайди алава хъувуна.
«Къе куь сувар я ва, республикадин Кьил яз, заз Дагъустандин халкьдин тIварунихъай квез къазанмишнавай агалкьун мубаракдай ва квез сагърай лугьудай мумкинвал ава. Дуьньяда, чи уьлкведа Дагъустандай тир спортсменар кьуршахар кьунин барадай кьетIендаказ тафаватлу жезва, чахъ дамах ийиз жедай крар авазва. Квел лайихлудаказ къимет эцигзава. Чахъ лап зурба спортсменрин, тренеррин тамам са къифле ава. Чна абур вири рикIел хуьзва, абуруз сагърай лугьузва ва абурал дамахзава. Чун инанмиш тирвал, Дагъустанда кьуршахар кьунин спортдин жуьредихъ хъсан гележег ава», — инанмишвал къалурна Владимир Васильева.
Гуьруьш давамарун яз, ада шабагьар гузвайбуру и ва я маса хилек кутунвай паюнилай аслу яз, «Дагъустан Республикадин вилик лайихлувилерай» жуьреба-жуьре дережайрин орденар тайинарун лазим тирди къейдна.
Дагъустандин Кьили спортсменрин лайихлувилерал лап вини дережада къимет эцигун герек тирдакай лагьана. Идалай гуьгъуьниз ам кьуршахар кьадайбурув ва абурун тренеррив государстводин шабагьар вахкунив эгечIна.
Физический культура ва спорт вилик тухунин карда чIехи лайихлувилерай, кьуршахар кьунин спортдин жуьредай дуьньядин чемпионатда виниз тир нетижаяр къазанмишунай Мегьамедрасул Гаджимегьамедоваз, Абдулрашид Садулаеваз ва Завур Угуеваз «Дагъустан Республикадин вилик лайихлувилерай» орденар ганва. Кьвед ва пуд лагьай чкаяр кьур спортсменриз, гьакIни спортсменрин тренерриз «РД-да физический культурадин ва спортдин рекьяй лайихлувилерай», медалар ганва, са бязи тренеррив региондин Кьилин патай РД-дин гьуьрметдин грамотаяр агакьна.
Вичин нубатдай яз, РД-дин кьуршахар кьунин спортдин жуьредай Федерациядин президент, азаддиз кьуршахар кьунай Дагъустандин хкягъай командадин кьилин тренер Сажид Сажидова, спортсменриз ва абурун тренерриз къазанмишнавай агалкьунар мубаракна ва лайихлувилерал къимет эцигунай республикадин руководстводиз сагърай лагьана.
В.Васильева тренерри тухузвай кIвалахдал, гьакIни спортсменри къазанмишнавай агалкьунрал виниз тир къимет эцигна: «Тренер устадвилин, культурадин чешне я. Кьуршахар кьунихъ Дагъустанда спортдилай виниз тир метлеб ава. Тренердин кIвалах — им марифатлувилин, вилик финин, агалкьунар къазанмишунин бине я. Чи спортсменар вини дережада аваз гьазурун таъминарзавай тренеррин коллектив сагърай. Гьелбетда, регьят тушир шартIара гъалибвал къазанмишунай квез виридаз чухсагъул лугьуз кIанзава. Куьне акьван инанмишвилелди гъалибвал къазанмишна хьи, и кар шаклувилик кутадай фикир кьванни садан кьилизни атанач. РикIел хуьх, куьне неинки Дагъустандин, гьакI Россиядин ва дуьньядин жегьилар патал чешне къалурзава. Спорт къе — им политикани, адалатлувални я. Куьне гьикI михьидаказ ва инанмиш жедайвал гъалибвилер къазанмишзаватIа, гьа саягъда за ва Гьукуматдин къурулушда кIвалахзавай зи юлдашрини гъалибвилер къазанмишиз чирун герек я. Чна квехъ галаз санал кIвалахда ва чи инсанрин итижар фикирда аваз, вилик акъвазнавай месэлаяр санал гьялда».
Республикадин руководителдихъ элкъвена, спортсменрин тIварунихъай рахай азаддиз кьуршахар кьунай Россиядин хкянавай командадин капитан, пуд сеферда дуьньядин чемпион Абдулрашид Садулаева лагьана: «Чи зегьметдал ва агалкьунрал икьван виниз тир къимет эцигунай чна разивал къалурзава. Чаз Квехъ сагъламвал ва чи халкьдин абадвал патал кIвалахдай къуватар хьун кIанзава. Жуван нубатдай яз, чна Куьне кутазвай умудар гьахъдиз акъудун патал мумкин тир вири крар ийида».
«Лезги газет»
