И йикъара Къазахстандин Алма-Ата шегьерда Россиядин, Къиргъизистандин, Азербайжандин, Узбекистандин, Кубадин, Албаниядин ва са жерге маса уьлквейрин спортсменрин иштираквал аваз кьиле фейи Поддубныйдин лигадин международный IV турнирда кьуршахар кьунай (азаддаказ, грекринни римлуйрин жуьреда ва дишегьлийри) чи ватанэгьли Шамиль Мамедова нубатдин сеферда вичин устадвал ва алакьунар вини дережада къалурна, инанмишвилелди къизилдин медаль къазанмишна. Аферин!
Поддубныйдин лигадин турнир кесерлубурун жергедик акатзава. Ам кьведра Москвада, садра Бишкекда кьиле тухвана. И сефердани турнирда иштиракай спортсменрин арада Азиядин, Европадин, дуьньядин чемпионатра гъалибвилер къазанмишайбур, гьакI Олимпиададин къугъунрин чемпионарни авай.
Азаддаказ кьуршахар кьунай 65 кг-дал къведалди заланвал авайбурун арада Шамиль Мамедован ва азербайжанви Олимпиададин 2 сеферда призёр, дуьньядин — 3 ва Европадин 4 сеферда (Азербайжандин азаддаказ кьуршахар кьунай спортдин тарихда ам 4 сеферда Европадин чемпионвилин тIвар къазанмишнавай тек са кас я, гьа гьисабдай яз алай йисуз ам Хорватиядин меркез Загребдани нубатдин сеферда Европадин чемпионвилин тIварцIиз лайихлу хьана) чемпион Гьажи Алиеван бягьс вирида еке итиждивди вилив хуьзвай. Чи ватанэгьлидиз ам 7:2 гьисабдалди кумукьна.
Рагнеда Рамалданова
