Алай йисан 15-октябрдиз Москвада, грэпплингдай кьиле фейи Россиядин ачух чемпионатда чи ватанэгьлийрини кIвенкIвечи чкаяр кьуна. Кьилди къачуртIа, 65 кг-дал къведалди ва виридалайни чIехи (абсолютный категорияда) заланвал авайбурун арада вичин къуватар ахтармишай Артур Агъаширинов къизилдин кьве медалдиз ва Далгат Османов (71 кг-дал къведалди заланвал авайбурун арада ва абсолютный категориядай) къизилдин ва буьруьнждин медалриз лайихлу хьана.
РикIел хкин: вичин ери-бине Ахцегь райондин Фиярин хуьряй тир А.Агъаширинова Арабрин Сад хьанвай Эмиратрин меркез Абу-Даби шегьерда жегьилрин арада дуьньядин кIвенкIвечивал къазанмишун патал джиу-джитсудай кьиле фейи акъажунра 46 кг-дин заланвал авай спортсменрин арада 1-чка кьунай. Ам Россиядин кIвенкIвечивал патал акъажунрани къизилдин медалдиз лайихлу хьана, агалкьунар адахъ мадни ава.
Гележег авай спортсменрикай тир Далгат Османова нубатдин акъажунра шуьтруь рангунин чIулар авайбурун арада вичин устадвал къалурна. Адан ери-бине СтIал Сулейманан райондин Эминхуьряй я. Дагъустандин медакадемияда агалкьунралди кIелзавай чи ватанэгьлиди виликдайни хъсан нетижаяр къазанмишна. Кьилди къачуртIа, Д.Османов ACB jj тешкилатдин версиядай кьиле тухвай дуьньядин чемпионатда, кIвенкIвечивал патал акъажунрани гъалиб хьанай. 2020-йисуз Далгата грэпплингдай Москвада кьиле фейи Европадин ачух Кубокни къазанмишна.
***
Грэпплингдай Наро-Фоминскда кьиле фейи центральный федеральный округдин (ЦФО) чемпионатда вичин ери-бине Докъузпара райондин Усугъчайдилай тир Абдурза Садиров 84 кг-дал къведалди заланвал авайбурун арада кьве жуьредайни (Gi ва NoGi) чемпионвилин тIварцIиз лайихлу хьана. Са тIимил йикъар идалай вилик ада Поддубныйдин Лигадин турнирдани къизилдин медаль къазанмишна. РикIел хкин: А.Садиров Сербиядин Нови Сад шегьерда (2017-йис) ва Румыниядин меркез Бухарест шегьерда (2019-йис) кьиле фейи Европадин чемпионатра къизилдин медалриз лайихлу хьана.
Гила А.Садирова ноябрдин вацра Каспийскда кьиле фидай Россиядин чемпионатда вичин устадвал къалурда.
Гаф кватай чкадал лугьун, Поддубныйдин Лигадин турнирда Даурен Куругълиева (92 кг-дин заланвал авайбурун арада Алан Багаевахъ галаз бягьс 12:2 гьисабдалди акьалтIна) -1, Анвар Аллагьярова (60 кг-дин заланвал авайбурун арада) 2-чкаяр кьуна.
***
И мукьвара Каспийскда, Али Алиеван тIварунихъ галай спортдин дворецда, джиу-джитсудай Дагъустандин кIвенкIвечивал патал акъажунар кьиле фена. РД-дин спортдин ва физический культурадин министерстводи Дагъустандин джиу-джитсудин федерациядихъ галаз санал тешкилнавай акъажунра республикадин 11 райондай тир саки 200-дав агакьна жегьилри (яшариз килигна са шумуд категориядай) иштиракна.
Хъсан нетижаяр къалурайбурун арада Махачкъала, Дербент, Каспийск шегьеррин хьиз, Ахцегь, Мегьарамдхуьруьн районрин жегьиларни хьун иллаки шад жедай кар я. Мегьарамдхуьруьн райондин Усуррин, ЦIийи Гъепцегьрин ва КьепIир-Къазмайрин хуьрера тренер-муаллим, джиу-джитсудай дуьньядин чемпион ва гзаф маса шабагьрин сагьиб Эйнар Экберован гъилик чпин устадвал хкажзавай аялри и сефердани хъсан нетижаяр къалурна. Кьилди къачуртIа, Къазиагьмед Гьажиев (74 кг), ва Садир Буржалиев (66 кг) 1-чкайриз лайихлу хьана. Самир Абдуллаева (81 кг), Мегьамед Шагьбанова (66 кг), Саад Шагьбанова (66 кг), Исламудин Алиева ва Исламудин Къадимова (кьведани — 50 кг-дин заланвиляй) буьруьнждин медалар къазанмишна.
КIвенкIвечи чкаяр кьур жаванри алай йисан декабрдиз Твердин областда кьиле фидай Россиядин кIвенкIвечивал патал акъажунра иштиракда.
Рагнеда Рамалданова
