Алатай хемисдиз Москвада Харкорд бокс (Hardcore Boxing) Лигадин нубатдин турнирдин сергьятра аваз пешекар боксеррин арада кьиле фейи бягьсина вичин ери-бине Мегьарамдхуьруьн райондин Советский хуьряй тир Расим Гьажалиева ярумчух залан категориядай (79 кг) вичин устадвал къалурна. Мурад Рамазановахъ галаз кьиле фейи бягьсина, судьяйрин сад хьтин къарардалди, чи ватанэгьли 6:2 гьисабдалди гъалиб хьана.
Тамашачийриз таъсирдайвал ва инанмишвилелди кьиле тухвай бягьсинай, судьяйрин сад хьтин къарардалди, ам мадни са гъалибвилиз лайихлу хьана: чи ватанэгьли турнирдин муьжуьдай сад лагьай паюниз (1/8) акъатна.
Расим Гьажалиеван тIвар спортдин алемда машгьурди я. Адакай сифте яз чна 2015-йисуз (а чIавуз ада Махачкъаладин автодорожный колледжда кIелзавай), Олимпиададин чемпион Гьайдарбег Гьайдарбегован призар патал 1999-2000-йисара дидедиз хьайи аялрин арада Дагъустандин кIвенкIвечивал патал акъажунра 1-чка кьурла, хабар ганай. Дагъустандин жегьилрин хкянавай командадин кьилин тренер М.Мегьамедова а вахтунда Расим Гьажалиеван бягьс виридалайни таъсирдайди хьайиди къейднай. Адалай кьулухъ чи ватанэгьлиди жуьреба-жуьре турнирра, акъажунра иштиракна, гъалибвилерни къазанмишна. Эхиримжи вахтара ада пешекар спортсменрин арада вичин къуватар ахтармишун кьетIнава. Чи мурад ада инанмишвилелди и рекье къачузвай камар мадни берекатлубур, спортдин кьакьан дережайриз акъатдай къуватар артух хьун я.
Рагнеда Рамалданова
