Сергей Меликован тапшуругъдалди Дагъустанда авай аялрин бахчайра ришветбазвилин вилик пад кьун патал ахтармишунар тешкилдайвал я. Республикадин Кьили ислен юкъуз кьиле фейи совещанидал къейд авурвал, Махачкъаладин администрацияди меркезда авай аялрин бахчайра кьиле тухвай ахтармишунрин нетижада винел акъатнавай бязи делилар гьич кьабулиз тежедай къалабулух кутадайбур тирди къейдна.
Кьилди къачуртIа, Махачкъаладин са бахчадиз дяведин махсус серенжемдин иштиракчидин аял, жуьреба-жуьре багьнаяр жагъуриз, кьабулнач. Сад лагьай сеферда гуя чка авач, кьвед лагьай сеферда карантин малумарнава лагьана. Амма гьа са вахтунда гьа и бахчадиз, 40 агъзур манатдин кьадарда аваз ришвет къачуна, маса хизандай тир аял кьабулна.
«Им вуч лагьай чIал я: махсус серенжемдин иштиракчидин аял патал чка авач, 40 агъзур манат гайитIа – ава. И кардал эхир эцигна кIанда», — лагьана С.Меликова ва къведай йисан эвел кьиляй талукь идарайрал ахтармишунрив эгечIун тапшурмишна.
«Лезги газет»
