3-декабрдиз Докъузпара райондин администрациядин дараматдин совещанийрин залда райондин кьил Абдурагьим Алискерова нубатдин совещание кьиле тухвана.

Адан  кIвалахда райондин кьилин заместителри, хуьрерин администрацийрин кьилери ва идарайрин руководителри иштиракна. Совещание райондин кьил  Абдурагьим Алискерова  ачухна ва иштиракчияр йикъан месэлайрихъ галаз танишарна. 2018-йисан 4-кварталда налукар кIватIунин пландин жигьетдай кIвалах гьикI кьиле физватIа, райондин кьилин заместитель Агьмед Агьмедова ихтилатна.

Адалай кьулухъ Каракуьредин ва Къалажухрин СОШ-ра кьиле физвай ремонтдин кIвалахрин гьакъиндай Султанмурад Магьмудова суьгьбетна. Малум хьайивал, Каракуьредин мектебдин са корпусдин  дараматдин къав дегишарнава ва Къалажухрин мектебдин са корпусдиз цIийи дегьлиз туькIуьрзава; мектебра са кьадарда рак-дакIар дегишарунин кIвалахарни кьилиз акъуддайвал я.

Абдурагьим Алискерова и мектебра тухузвай ремондин кIвалахар тайинарнавай вахтуналди тамамарна кIанзавайдакай къейдна. Мадни ада хуьрерин администрацийрин кьилериз  улакьрин рекьерал гуьзчивал тухунин, рекьериз ятар акъат тавун патал тайин кIвалахар тухунин тапшуругъар гана.

Кьиле фейи совещанидал тIебии газдиз, токдин трансформаторриз, рекьериз ва Авадан хуьруьн ФАП-диз талукь мэселаяр веривирдна.

Эхирдай райондин кьил Абдурагьим Алискерова культурадин управленидин начальник Беглер Бабаевал, алукьзавай 12-декабрдиз  Россиядин федерациядин  Конституцидин йикъаз талукь яз, концертдин программа тешкилунин месэла тапшурмишна.

«Лезги газет»