1-октябрдиз Докъузпара райондин кьил Абдурагьим Алискерова райадминистрациядин аппаратдин къуллугъчийрихъ, райондин идарайрин работникрихъ, хуьрерин кьилерихъ галаз нубатдин совещание тухвана. Адан кIвалах ачухуналди, райондин кьили иштиракчияр йикъан повесткадихъ галаз танишарна. Налогар кIватIунин рекьяй сифте гаф райадминистрациядин кьилин заместитель Агьмед Агьмедоваз гана. Ада алай йисан пуд лагьай кварталдиз талукь яз кIватIнавай эменнидин, чилин ва маса жуьрейрин налогрикай кьилди-кьилди баянар гана. Наразивал ам тир хьи, вири хуьрерин кьилеривай 100 процентдин кьадарда аваз налогар кIватIиз жезвач. Ва я и кардик жавабдарвилелди хев кутазвач.
Райондин алава образованидин работникрин истемишунрихъ галаз кьан тийизвай къуллугърин патахъай, школаяр хъуьтIуьн сезондиз гьазурвилин гьаларикай, райондин тешкилатрин къуллугъчийри къачузвай къазанжийрин декларацияр тамамвилелди ацIур тийизвайдакай рахунар кьиле фена. Талукь серенжемар кьабулун патал вири и терефар райондин прокуратуради вичин гуьзчивилик кутунва.
«Лезги газет»
