Дербент РИА-дин конференцийрин залда, Дагъустандин халкьарин чlаларал Википедиядин разделар вилик тухунин месэлайриз талукьарнавай сад лагьай семинар кьиле фена.
Ам тешкилайбур “Дербент” Фонд ва “Викимедиа РУ” НП (некоммерческое партнерство) я.
Адан кlвалахда башкирринни урус Википедиядин иштиракчи Ришат Сайфутдинова, лезги Википедиядинни башкиррин Википедиядин администратор Олег Абарникова, урус Википедиядин администратор, “Викимедиа РУ” НП-дин директор Владимир Медейкоди, “Викимедиа РУ” НП-дин член Дмитрий Жукова, лезги Википедиядин иштиракчи, журналист Мурад Шихагьмедова, “Дербент” фондунин директордин заместитель Амил Саркарова, эрзян Википедиядин администратор ва координатор Андрей Петрова, лезги чlалан муаллимри, “Россиядин виридалайни хъсан муаллим” конкурсдин гъалибчи Шамсудин Магьамдарова, Раиса Алиметовади, журналистри ва масабуру иштиракна.
Семинардин кьилин макьсад милли Википедия вилик тухун патал итижлу темайрай энциклопедический макъалаяр кхьидай цlийи иштиракчияр жагъурун я.
Мярекат ачухай Амил Саркарова къейд авурвал, Википедияди милли чlалар еримлу авуниз куьмек гузва.
— Шаирри, писателри, милли школайрин муаллимри ишлемишзавай тежриба, лингвистикадин илим, гьайиф хьи, Википедияди ийизвай истемишунривай гуьгъуьна амукьзава. За фикирзавайвал, муаллимриз ва школьникриз дидед чlал чирунин ва хуьнин карда Википедиядикай хъсан куьмекчи жеда. Икl хьун патал милли чlалан муаллимар ва аялар Википедияда иштиракунал желбунихъ хъсан метлеб жеда.
Гуьгъуьнлай рахай Медейко Владимира, Олег Абарникова, башкиррин Википедиядин администратор Зуфар Салихова, Андрей Петрова Википедиядин мурад-метлебдикай, чпи анин разделра тухузвай кlвалахдикай, месэлайрикай гегьеншдиз суьгьбетна.
Википедиядин тарих:
2001-йисуз американвияр тир Джимми Уэйлсома ва Ларри Сэнгерома Международный электронный “Википедия” энциклопедия кардик кутуна. Сифтедилай башламишна ам виридуьньядин волонтёррин комерциядинди тушир проект я. Адахъ са шумуд маса проектарни ава: (шикилрин “Викисклад”, “Викигид”, “Викисловарь”, “Викицитатник” ва масабур). “Викимедиа” фондуни вичин кlвалах кьилдин ксарин ва тешкилатрин куьмекдалди кьиле тухузва. Дуьньяда виридалайни гзаф гьахьзавай сайтрин арада “Википедиядин” сайт вад лагьай чкадал ала.
“Википедиядин” тафаватлувал ам я хьи, ана гзаф чlаларалди кхьизва. Алай вахтунда ана дуьньядин 295 чlалал разделар кардик ква. Абурукай 10% Россиядин халкьарин чlалар я. Виридалайни тамамди 1,4 миллион макъала авай, дуьньяда ирид лагьай чкадал алай урусрин “Википедия” я. Россиядин чlаларин разделрай кьвед лагьай чкадал чеченрин “Википедия”, пуд лагьай чкадал — татаррин, ахпа чувашринди ала, гуьгъуьнлай башкиррин ва маса “Википедияр” къвезва. Дагъустандин халкьарин разделра (чеченар квачиз) лезгийрин “Википедия” (3847 макъала,) хъсандиз виликди физва, ахпа аваррин (2311) ва яхулрин (1211). Дагъустандин маса халкьар Википедиядик гьеле экечlнавач.
Къагьриман Ибрагьимов
