13-августдиз Махачкъала шегьердин пляждин мулкарал “Здоровая нация” лишандик кваз Физкультурникдин йикъазни республикадин меркездин 165 йис тамам хьуниз талукьарнавай акъажунар кьиле фена.
Пакаман сятдин 8-дан зураз гатIунай мярекатдин иштиракчийрин арада республикадин гьукумдин ва жемиятдин векилар, машгьур спортсменар, спортдин ветеранар ва масабур авай.
Фестивалдин сергьятра аваз акъажунар спортдин 9 жуьредай кьиле фена: волейбол, футбол, сирнавун, чене акъудун, елкенрин спорт, путар хкажун, чкадилай хкадарун, зверун, азаддиз кьуршахар кьун.
Акъажунар ачухуниз талукьарнавай мярекатдал РД-дин спортдин ва физический культурадин министр Сажид Сажидов, Махачкъала шегьердин администрациядин векилар, Олимпиададин къугъунрин чемпионар ва масабур рахана.
Къейд ийин хьи, акъажунра чпин къуватар алцумайбурун арада чи ватанэгьлиярни авай. Мисал яз, путар хкажунай вичин командани галаз фестивалда спортдин мастер, рекордсмен, бине Мискискарин хуьряй тир Эмин Ибрагьимова иштиракна. Абуру кIвенкIвечи чкаярни кьуна. Мисал яз, 32 кг заланвал авай путар хкажунай Э.Ибрагьимоваз барабарди хьанач. Ам хъуткьу-нарна (рывком) путар хкажунай 1-чкадиз лайихлу хьана. Адан ученик Гьажи Агьмедова путар яргъал мензилдиз гадарунай Дагъустанда цIийи рекорд эцигна (32 кг-дин пут 6 метрни 10 сантиметр мензилдиз гадарна). Э.Ибрагьимован маса ученикди — дуьньядин рекордар эцигнавай Султан Османовани фестивалдин иштиракчияр гьейранарна. Ада 52 кг къвезвай путар сарарив кьуна, кIвачин кьилел акъвазна, юкь агъузна, кьве тупIу 200 кг къвезвай штанга хкажна.
Саки 2 сятда давам хьайи акъажунра Э.Ибрагьимова жегьилриз мастер-классни къалурна. Фестивалдин гъалибчияр дипломриз ва багьа пишкешриз лайихлу хьана.
Агьмед Магьмудов
