Багъманчивал, уьзуьмчивал, малдарвал хьиз, СтIал Сулейманан районда магьсулдарвални хуьруьн майишатдин кар алай хилерик акатзава. ИкI, акъатзавай 2022-йисуз райондин хуьруьн майишатдин карханайри, санлай къачурла, 1023 гектардай 2594 тонн техил кIватI хъувуна. Гектардин бегьерлувили 25,35 центнер тешкилна.
Зулун магьсулрикай кьилди рахайтIа, абур 853 гектарда цанвай. Анрай, гектардин бегьерлувал 25,5 центнер яз, 2176 тонн техил вахчуна. Гьажибугъдаярни кваз, гатфарин техилар 350 гектардай кIватI хъувуна. Анрай, гектардин бегьерлувал 40,2 центнер яз, 1408 тонн техил ва гьажибугъдаяр вахчуна.
Къведай йисан бегьер патал райондин хуьруьн майишатдин карханайри, лежбервилинни фермервилин майишатри (“Зардиян”, “Горец” ООО-ри, “Новый путь” СПК-ди, “Шах-Абузар”, “Гайвазов Р. М.” КФХ-ри) ва са шумуд ЛПХ-ди саки 600 гектарда зулун магьсулрин тумар цанва. Техилар цанвай 110 гектардин никIериз 1,6 тонн миянардай шейэрни вегьенва.
Районда магьсулдарвал авай гьалдикай рахадайла, чаз ихьтин са кардикайни лугьуз кIанзава. Сифте нубатда къейд ийин: техилар цазвай майданар, вилик йисарив гекъигайла, тIимил хьанва. Идан нетижа яз, вахчузвай техилдин кьадарни йисалай-суз тIимил жезва.
Гуьнепатан хуьрерин чилерал зулун ва гатфарин магьсулар цазмач лагьайтIани жеда. Вилик йисара техилар цаз хьайи бегьерлу никIер гила тамун участокриз элкъвенва, анагар кул-кусри кьунва. Мадни, гуьнепатан хуьрерин хуьруьн майишатдин карханайрихъ калун участокрани чилер ава, вилик йисара анра техилар цазвай. Аранда авай участокра багълар, уьзуьмлухар кутунва, са менфятни къачун тийизвай участокарни ама. Районда багъларин, уьзуьмлухрин майданар йисалай-суз артух жезва. Ида шадвал кутазва.
Арандиз эвичIнавай хуьрерин дагъдин зонайра авай участокрикайни тамамвилелди менфят къачузвач. Мукалралди гад кIватI хъийидай вахтара дагъдин участокрани техилар цазвайди тир. Лугьудайвал, илим ва техника вилик фенвай алай вахтунда дагъдин участокар чIурухъанриз, тамариз элкъуьрун дуьз кар жезвани? Ваъ, гьелбетда.
Ша чна магьсулдарвилин хиле авай вири мумкинвилерикай тамамвилелди менфят къачун. Ида халкьдин суфра берекатлу ийида.
Хазран Кьасумов
