Велиханов Намет Агъаханович 1920-йисан 14-августдиз Цналрин хуьре кесиб лежбердин хизанда дидедиз хьана. 1937-йисуз ада Цмуррин ирид йисан школа акьалтIарна.
1940-йисуз Дербентдин педучилище куьтягьай Н.Велиханов Цналрин хуьруьн сифтегьан школадин директорвиле тайинарна. Гьа са вахтунда жегьил коммунистди хуьруьн Ф.Энгельсан колхозда сифтегьан парторганизациядин секретарвилин везифаярни тамамарзавай. Фашистри Ватандал вегьейла, жегьилар дяведиз тухвайла, ада хуьре амай кьуьзуьбур, дишегьлияр, аялар сад авуна, йифди-югъди кIвалах ийиз, чебни хуьз, фронтдизни куьмекар гун тешкилна.
1942-йис дяведин шартIара лап четинди ва кьисметар гьялдайди хьанвай. Фашистар Сталинграддив агакьнавай. Гьа и четин вахтунда Наметавай кьарай кьаз хьанач. Муаллим, школадин директор, коммунист, виридаз сагърай лагьана, гуьгьуьллувилелди фронтдиз фена.
Н.Велиханова Грозныйда махсус училище акьалтIарна. Ада, взводдин командир яз, Украинский фронтда къуллугъна. Аскерди ивияр экъичай хейлин женгера иштиракна, ам Берлиндиз кьван душмандин геле гьатна, ЧIехи Гъалибвилик вичин пай кутуна.
1945-йисан 16-апрелдиз Берлин къачун патал кьиле физвай къати женгера 25 йиса авай къагьриман хци Ватан патал чан гана. Адан кьегьалвилер гьукуматди са шумуд сеферда къейдна. Ам Ватандин дяведин Яру гъед, Женгинин Яру Пайдахдин орденриз ва 6 медалриз лайихлу хьана.
Цналви Велиханов Германиядин Брандербургдин Гросс-Бедмейсан хуьруьн патав фаракъатнава.
Цналрин хуьруьн жемятди Наметаз ва Ватан патал жегьил чанар гайи 63 хуьруьнвидиз еке гуьмбет — обелиск эцигнава.
Хуьруьн юкьван школа Велиханов Намет Агъахановичан тIварунихъ янава.
Рамазан Велибегов
