Кьуд пата цуьк акъуднавай гатфарин гуьлуьшан береда зун Мегьарамдхуьруьн райондин Хъартас-Къазмайрин хуьруьз акъатна. Лезги хуьрер, анра яшамиш жезвай жемятар  заз гзаф кIанда. Зун гьамиша тамарзлу я чпин баркаллу краралди хуьрерал абур гъизвай, жемятдин арада гьуьрмет, авторитет авай инсанрихь галаз гуьруьшмиш хьунихъ. ИкI, зи ихтилат и хуьруьн кавха  Омар  Нагъиевич  Нагъиевакай  я.

Вичин кабинетда столдихъ ацукьнавай Омар Нагъиеван телефондиз датIана зенгер къвезва. Виридаз ада жаваб гузва. Зенгер ан­жах хуьруьнвийрин дерди — гьалдикай тир. Экуь кабинетда Омар Нагъиев ацукь­навай столдихь къанни цIуд йисни ирид вацра адан чIехи буба Нагъиевни хьайиди я. Советдин дараматни ада, къван-къванцел эцигиз, ви­чин­ коллективдин куьмекдалди арадиз акъуд­най. Хуьруьн советдин цIийи идарада сифте загс авурди а береда Гьабибуллагь Нагъиевахъ га­лаз кIвалахай, алай вахтунда администрациядин кьилин заместитель Ханагьмедова Сел­минат, Омаран хайи хала я. Жегьил бизнесменди хуьре тухузвай кIва­лахар, адан чалишмишвилер, инсанпересвал акурла, райондин сагьибри Омар Нагъиеваз райсобранидин депутат хьун патал кандидатура эцигун теклифнай. Жемятди адаз еке ихтибар авуна. А вахтар адан авторитет виниз хкаж жезвайбур тир.

Кар алакьдай,гайи гафунал кIевиз акъваздай, инсандин гъавурда гьатдай биз­нес­­мендиз­ 2015-йисуз райондин сагьибди хуьруьн администрациядин кьил хьун меслятна. Омар сифтени-сифте вичин чIехи бу­ба Гьабибуллагьан патав фена. Ада хтулдиз­ хуьр мадни абад авун патал зегьмет чIу­гун меслятна. Бубадин тарсар­ Омараз гьамиша бакара къвез хьана. Ингье гьа йикъарилай инихь саки пуд йис алатнава. Омар На­гъиев хуьруьн кавха я. Алай вахтунда­ ана 1790 кас яшамиш жезва, 378 кIвал ава. Са вах­тара районда машгьур совхозда кIва­лахза­­­­вай­бурукай бязибур кеферпатахъ фенва. Амай­буру хуьруьн чилерин 2/3 пай ижара къа­чу­на, уьзуьмлухар арадиз гъана­, емишрин­ багъ­лар кутуна, гьарма сад чпин крарал машгъул я. Хуьруьн бизнесменрин парник­рал 80 кас­ди кIвалахзава, хъсан мажибарни къа­чуз­ва­­. Бетондин, чиргъедин заводрани зегь­мет чIуг­­вазва. Хуьре авай яшлу инсанарни На­гъи­е­ван гуьзчивилик ква. Хуьруьн жегьил­рин спортдин­ рекьяй гьунарар яргъариз машгьур хьанва. И карда абурук чIехи гьевес кутаз­вай­ди ва еке кIва­лах тухвайди, гьелбетда, На­гъи­ев­ Омар я.

Хуьруьн цIусад депутатдин корпусдин сагьиб Мирзамегьамед Гьарунова ва  заместитель Селминат Ханагьмедовади Омаран кIвалахдиз еке къимет гана.

— Сифте ада идарадин дарамат капре­монт­на, мебелдалди таъминарна, 1-мертебеда авай библиотекадиз ва медпунктуниз вичин харжидалди чимивал гъана. Алай вахтунда хуьруьн цIийи магьлейра эквер тунин кIвала­хар куьтягьзава. Нагъиева вичин хсуси харжи­далди трансформатор къачунва. Хуьруьз гьахь­дай­ гирведал ада еке арка эцигдай фикир кардиз элкъуьрзава. Целди таъминарун патал къуяр язава.

БицIи аялар патал къугъвадай чкаяр гьазурзава. Исятда Нагъиеван вилик квай дерди жегьилар патал футболдин майдан гьазурун я. Аниз харжияр стхаяр тир Омар ва Лео­нард Нагъиеври чпин хивез къачунва. Хуьруьн куьчейра са км. зур мензилда къир цадай проект гваз Нагъиев гьам меркездиз, гьам райондиз физ-хквезва. Проект тестикьарнава лагьайтIа жеда. Куьчейриз чиргъ вегьинални машгъул я администрациядин сагьиб. Омар вич жегьил ятIани, адан фикирар камаллу агъса­къал­дин хьтинбур я, еке виждан авай кас я, — къейдна М.Гьарунова.

— КIелна, хуьруьз хтай жегьил пешекарди хсуси кархана «Дорстрой» ачухнай. Бизнесда сифте камар къачуз, базардин эконо­ми­кадин сирер чириз алахънай Омар. Адан ча­лишмишвилери аквадай крар арадал гъизвай. Гьа вахтундилай башламишна, Ома­ра ви­челай алакьдай куьмекар гузва хуьруьз-кIва­­­лиз, — лагьа­на адан диде Назифа Нагъиевади.

Хуьруьн школадин директор Анвер Агьа­дуллаевани Омаран гьар са кардал вич  кьару тирди, ада жедай  куьмекар ийизвайди къейдна. Школадин гьаятда къир цана, жугъу­нар туь­кIуьрна, ремонтриз куьмекарзава. Школадин вири мярекатриз пулдин куьмек гузва, са шумуд классдиз гьатта формаярни вичин патай багъишна. Школадал адан гъил гьами­ша ала, —  лагьана эхирдай директорди.

Зал Омар Нагъиеваз тарсар (ам хуьруьн агъсакъалрин Советдин кьилни я) гайи муаллим Гьасан Гьасановни гьалтна. Адан ихтилатар, асул гьисабдай, Омаран гележегди­кай тир. Вичин ученикдин къастарал ам рази я, адак еке умуд кутунва, Омар На­гъие­ван дережаяр мадни вине жедайдахъ агъунва.

Омар Нагъиеван мирес, талукь кас тир МВД-дин полковник Шихкерим Шагьпазова къейд авурвал, Омар девирдин инсан я. Хуьр абад авунин рекье ада ненинки гьукуматдин истеми­шунрин къайдада кIвалахза­ва, гьакI адан мер­­гья­­матлувилин кIва­лах­рин чинарни­ йикъа­лай-къуз дегиш жезва. Адан чIехи стха Леонард Моск­­вада вичин хсуси карханадиз регьбервал­ гуз­вай кас я. А кархана райондин­ реестрада ава. Райондин бюджетдиз къвезвай налогри яшайишдин рекьяй куьмекардай мумкинвал гузва. Идалайни гьейри, Лео­нарда хуьруьз гьамиша вичини куьмекарзава. Гъве­чIи стхадиз ам даях, хуьруьн дамах я. Хуьрерай фенвай 60 касди Леонардан гъилик кIва­лах­зава. Спорткомплексдин инвесторни гьам тирдакай лагьана Шагьпазова.

Маршруткадин шофер, гьа и хуьруьнви Гьасанбегов Садиллагьани вич админи­ст­ра­ция­дин кьил О.Нагъиева хуьре ийизвай хъсан кра­рилай рази тирди къейдна.

Омараз райондин администрациядин патай Гьуьрметдин грамотани ганва террордиз акси кIвалахар тухвайдай.

Хуьр аваданламишунин кIвалахрал маш­гъул Омар Нагъиеваз илгьам ба­гъиш­за­­вайди, гьелбетда, адан хизан, балаяр я. Ди­­де-буба ла­гьайтIа, Омаран уьмуьрдин маякар я.

Нагъиеврин мергьяматлувилин крар вири­даз ашкара я. Ихьтин инсанар чка-чкада хьа­найтIа, чи хуьрер, кIвалер абад жедай. Дугъ­р­и­­данни, абур «За любовь к родной земле» къагьриманвилин тIварцIиз фадлай лайихлу я. Квехъ мадни агалкьунар хьурай, гьуьрметлу Омар Нагъиевич!

Бикеханум Алибегова