И йикъара Дагъустандин здравоохраненидин министерстводин актовый залда РФ-дин ва РД-дин лайихлу духтур, РФ-дин ва РД-дин здравоохраненидин отличник, здравоохраненидин работникрин профсоюздин рескомдин консультант, РД-дин здравоохраненидин министерстводин патав гвай общественный советдин президиумдин член, Дагъустандин здравоохраненидин хиле къуллугърал тайинардай конкурсрин комиссиядин член, Махачкъала шегьердин Ленинский райондин ветеранрин советдин президиумдин член, кьилин категориядин тешкилатчи ва пешекар, СССР-дин гражданвилин оборонадин отличник Агъамегьамед Хаметович Хаметовав Дагъустандин здравоохранение вилик тухуник кьетIен лайихлувилерай, виниз тир пешекарвиляй ва уьлкведин агьалийрин сагъламвал хуьнин рекье гьакъисагъвилелди зегьмет чIугунай «Ватан хуьдайди» Дагъустандин общественный тешкилатрин Союздин (СООД) къарардалди гун кьетIнавай «Честь и гордость Дагестана — Золотой орел» кьилин орден вахкуниз талукьарнавай шад мярекат кьиле фена…
Ана общественный комиссиядин членри, “Ватан хуьдайди” СООД-дин, РД-дин здравоохраненидин патав гвай Общественный Советдин президиумдин, Махачкъаладин агъсакъалрин советдин, генерал-полковник Мегьамед Танкаеван тIварунихъ галай Дагъустандин жегьилар ватанпересвилин руьгьдаллаз тербияламишдай фондунин, РФ-дин махсус къуллугърин ва къанун-къайда хуьдай органрин работникрин Ассоциациядин векилри ва маса ксари иштиракна.
“Ватан хуьдайди” СООД-дин председатель Гьасангьуьсейн Абдулжелилова, шабагь вахкудайла, къейд авурвал, эхиримжи са шумуд вацра “Жемиятдин фикир” региондин фондуни здравоохраненидин хиле яргъал йисара кIвалахзавай, и хиле зегьмет чIугвазвайбурун профсоюз вилик тухузвай, медицинадин виридалайни хъсан работник-тешкилатчи, гьакIни гзаф миллетар яшамиш жезвай чи республикадин медицина вилик тухуник лайихлу пай кутазвай ва вичин пешекарвилелди амайбурузни чешне къалурзавай кас жагъурун патал агьалийрин арада хабар кьун (опрос) тешкилнавай. Нетижада хабарар кьурбурун чIехи паюни ва адан гъиликай себеб хьайи азарлуйри здравоохраненидин хилез вичин уьмуьрдин 58 йис бахшнавай Агъамегьамед Хаметован кандитатура къалурна.
Шад мярекатдал рахай гзафбуру лагьайвал, дугъриданни, къенин юкъузни кIвалахдин къайгъуйрин яцIа авай, духтурвилин виниз тир тIвар лайихлудаказ хуьзвай, республикадин общественный уьмуьрда активнидаказ иштиракзавай, гьар са кардив намуслудаказ эгечIдай ва акьалтзавай несилдиз, гьам кIвалахдин, гьамни виниз тир инсанпересвилин ерийрал гьалтайла, чешне тир, зегьмет чIугур гьар са чкада вич бажарагълу тешкилатчи яз къалурай, вичикай хъсан майилар тур Агъамегьамед Хаметовичалай хъсан маса кандидатура жагъуриз хьун бажагьат мумкин кар тир. Агъамегьамед Хаметовичан виниз тир пешекарвилин ва чалишмишвилерин нетижада Дагъустандин здравоохраненидин работникрин профсоюздин дуствилин коллективдилай тIугъвалдин девирда арадал атай четинвилерай лайихлудаказ экъечIиз алакьайди, Россиядин здравоохраненидин работникрин профсоюзрин арада чи республикадин тешкилатдин кIвалахдиз Москвади хъсан къимет гузвайдини къейдна.
Эхирдай Агъамегьамед Хаметовича общественный комиссиядиз ва здравоохраненидин хиле яргъал йисара вичи чIугур зегьметдиз кIвалахдин рекьяй юлдашри виниз тир къимет гунай, гьакIни тебрикдин келимайрай сагърай лагьана, вичи инлай кьулухъни Дагъустандин ва Россиядин медицинадиз вафалувилелди къуллугъдайдахъ инанмишарна.
РикIел хкин: А.Хаметова вичин зегьметдин рехъ 1963-йисуз, гьеле студент яз, медбратвилин везифаяр кьилиз акъудунилай башламишнай. 1967-йисуз агалкьунралди мединститут акьалтIарай жегьил Пермдин областдин ракьун рекьин больницадиз духтур-терапевт яз рекье туна. Ам шегьердин халкьдин контролдин членни тир. 1970-йисалай ада Махачкъаладин ракьун рекьин больницадин поликлиникада, балугъчивилин промышленностдин Управленидин медчастунин кьилин духтурдин заместителвиле ва поликлиникадин заведующийвиле зегьмет чIугуна. 1983-1986-йисара ада РД-дин здравоохраненидин министерстводин 2-отделдин начальниквилин ва шегьердин 6-нумрадин поликлиникадин участокдин терапевтвилин везифаяр кьилиз акъудна. Вири и йисара ада халкьдин контролдин общественник язни зегьмет чIугуна. 1986-йисалай шегьердин здравотделдин заведующий яз, шегьерэгьлийрин сагъламвилин гьал хъсанарун патал азаррин вилик пад кьадай серенжемар кьиле тухуз хьана. И карда адалай еке агалкьунарни къазанмишиз алакьна, медицинадин рекьяй типовой дараматар эцигун патал еке чалишмишвилер авуна ва икI мад. Ам намуслу зегьметдай ганвай хейлин шабагьрин сагьиб я.
Рагнеда Рамалданова
