13-февралдиз Дагъустан Республикадин Кьил Сергей Меликова гьукумдин органрин руководителрихъ галаз кар алай важиблу месэлайриз талукь совещание кьиле тухвана. Кьилди къачуртIа, бюджетдин такьатрин гьисабдай дараматар, имаратар эцигунихъ ва абур капитальнидаказ ремонт авунихъ галаз алакъалу крар, Дагъустандин Кьили ачух эфирда гайи тапшуругъар кьилиз акъудзавай гьал ва иесисуз гьайванрин месэла гьялун веревирдна.
РД-дин эцигунрин, архитектурадин ва ЖКХ-дин министр Артур Сулейманова 2022-йисуз махсус программайрин сергьятра аваз кьиле тухвай кIвалахрин нетижайрикай ва алай йисан планрикай малумат гана.
Федеральный “Формирование комфортной городской среды” проектдиз талукь вири крар шаз 100 процентдин тамамарна. Республикадин 47 муниципалитетда 179 мулк аваданламишна. Гъилевай йисуз муниципальный 44 тешкилатда 142 мулк (гьаятар, куьчеяр) аваданламишда.
Федеральный “Михьи яд” проект уьмуьрдиз кечирмишунин сергьятра аваз алатай йисуз Дагъустанда 4 имарат эцигна. Гъилевай йисуз Казбек райондин Дылым, Ахвах райондин Карата хуьрериз цин линияр тухуда. Буйнакск шегьердин агьалияр тамамвилелди целди таъминарунин мураддалди “Чиркей-Буйнакск” водовод цIийикIа туькIуьр хъийида.
Яшайишдин кIвалер эцигунал гьалтайлани, РД-дин эцигунрин, архитектурадин ва ЖКХ-дин министерстводи хъсан нетижаяр къазанмишна. Алатай йисуз республикада яшайишдин са миллион кв.метрдин майданар авай кIвалер ишлемишиз вахкана. Гъилевай йисуз лагьайтIа, и рекъем 1 миллионни 132 агъзур квадратный метрдиз барабар жеда.
Куьгьне ва хаталу кIвалера авай агьалияр куьчарунин программа уьмуьрдиз кечирмишзавай гьалдикай министр кьилди рахана. 2022-йисуз 2 агъзур агьалидин яшайишдин кIвалерин гьалар хъсанарна. Гьа са вахтунда лугьун лазим я хьи, алатай йисариз талукь программаяр кьилиз акъуд тавунихъ галаз алакъалу яз гьялиз тахьанвай хейлин месэлаяр амазма. Яшайишдин кIвалерин къулайвилер хъсанар хъувуна кIанзавай 181 хизан нубатда амазма.
Куьгьне ва хаталу кIвалерай инсанар куьчар хъийидайла, Сергей Меликова абуруз лап къулай шартIар тешкилна кIанзавайдал фикир желбна.
Вичин суьгьбет давамаруналди, Артур Сулейманова “Региональный реестр незавершенных объектов капитального строительства” автоматламишнавай информациядин къурулуш арадал гъунин важиблу кIвалахдикайни ихтилатна. Ам кардик акатайла, гъиле кьуна, куьтягь тавунвай вири эцигунрикай делилар малум ва лазим ксариз гьар йикъан, вацран, кварталдин кIвалахрикайни чир жеда.
Идалайни гъейри, министерстводи Дагъустандин эцигунрин кIвалахдиз талукь махсус портални кардик кутазва. Ана республикада кьиле тухузвай вири эцигунриз талукь малуматар, делилар, шикилар гьатда.
Эцигунрин хилен менфятлувал хкажун патал алай аямдин мумкинвилерикай менфят къачунай ва рекъемрин технологияр кIвалахда ишлемишунай Сергей Меликова министр Артур Сулеймановаз сагърай лагьана. “Им виликди къачунвай чIехи кам я. Ада чаз и хиле виликдай авай “рагъул” гзаф кьадар схемайрикай кьил хуьдай мумкинвал гуда ва эцигунар гъиле кьазвай ксариз чпин кIвалах ачухдиз тухудай мумкинвални жеда”, — къейдна Сергей Меликова.
Совещанидал эцигунрик чпин такьатрин пай кутазвай иштиракчи агьалийрин ихтиярар хуьниз талукь месэладизни килигна. Сергей Меликова чпикай тапарарнавай дольщикрин сиягь туькIуьрунин тапшуругъ гана. Алай йисан 1-мартдалди вири муниципалитетри минстройдив талукь тир малуматар агакьарун лазим я. РД-дин Гьукуматдин Председателди и месэлада вири агьалийрин итижар хуьн лазим я.
“Яшайишдин кIвалер эцигдайла агьалийри чпин пулар вугана, амма садазни гьеле чпин кIвалер акунвач. Инсанрин вил чпиз хиве кьунвай мажбурнамаяр кьилиз акъудунал ала. Чнани абуруз и месэла гьялиз куьмек гана кIанда”, — лагьана Сергей Меликова.
РД-дин Кьилин ва Гьукуматдин администрациядин руководителдин заместитель, РД-дин Кьилин информациядин сиясатдин ва пресс-къуллугъдин управленидин начальник Рашид Акавова региондин Кьили ачух эфирдихъ галаз алакъалу яз гайи тапшуругъар кьилиз акъудзавай гьалдикай малумат гана.
ГьакIни совещанидал республикадин са жерге муниципалитетрин куьчейра иеси галачиз авай кицIерин месэладизни кьилди килигна.
Мярекатдикай гегьеншдиз Дагъустандин Кьилин сайтдай кIелиз жеда.
Хийир Эмиров
