СтIал Сулейманан райондин медицинадин идарайрин работникрин советдин заседание алай йисуз гегьенш къайдада аваз кьиле фена. Адан кIвалахда муниципалитетдин кьил Нариман Абдулмуталибова, райадминистрациядин, массовый информациядин такьатрин векилри иштиракна. Анал алатай йисан кIвалахдин нетижаяр кьуна, агьалийриз медицинадин рекьяй хъсан ери аваз къуллугъ авунин жигьетдай алай вахтунин важиблу месэлаяр веревирдна, алай йис патал кIвалахдин везифаяр тайинарна.
ЦРБ-дин кьилин духтур Жафер Къурбанисмаилова вичин гьахъ-гьисабдин докладда медицинадин къуллугъчийрин кIвалах къалурзавай гьакъикъи рекъемар, мисалар гъана. Кьилди къачуртIа, ам коронавирус чукIуникди духтуррин хиве гьатай алава везифайрал, азардин вилик пад кьун ва адакди, гьакIни стIалжемдикди начагъ хьайибур сагъар хъувун патал абуру тухвай кIвалахдал гегьеншдиз акъвазна.
Хъсанвилихъ хьанвай дегишвилерикай рахадайла, Жафер Къурбанисмаилова ЦРБ-дин патав компьютердин диагностикадин (КТ) отделение ачухун къейдна. Компьютердин томограф маса къачун ва дарамат эцигун патал пулунин такьатар РД-дин здравоохраненидин министерстводай ахъайна. Мадни КТ патал кьилдин корпус эцигдай пулдин такьатар меценатрин ва игьсанар кIватIдай инсанрин патай хьана.
Хъсан кар мадни ам я хьи, райондин са шумуд хуьре модульный ФАП-ар эцигна, медицинадин идарадин автопарк “Хуьрерин мулкар комплекснидаказ вилик тухун” госпрограммадай чара авур реанимобилдалди артух хьана.
Советдин заседанидал педиатриядин отделенидин заведующий Зильфи Аллагькъулиева, терапиядин — Эльвира Мирзеханова, акушер-гинеколог Роза Шамсудинова, кьилин духтурдин экономикадин месэлайрай заместитель М.Межидова рахана. Малум хьайивал, кьилди-кьилди гьар са отделенидихъ, къуллугъдихъни тарифдин крар, тайин нетижаяр ава.
Отделенийрин заведующийрин рахунриз баянар гун яз, ЦРБ-дин кьилин духтурди кIвалахда хъсан нетижаяр авай хьиз, санлай къачурла, мадни фикир хгана кIанзавай месэлаярни авайди къейдна. Абур арадай акъудун патал ЦРБ-дин руководстводи муниципалитетдин здравоохранение вилик тухунин план туькIуьрзава. Планда райондин больницадин кесер ва агьалийриз къуллугъ авунин ери хкажунихъ рекье тунвай серенжемар, жавабдар ксар, гьар са пункт тамамардай вахтар къалурда.
Заседанидал райондин кьил Нариман Абдулмуталибовни рахана. Адан фикирдалди, сифте нубатда кьилин фикир кIвалахдин еридиз, медицинадин идарайрин материально-технический база мягькемаруниз, гьа са вахтунда агьалийрин патай медработникриз авай ихтибар хуьнизни гун лазим я.
— Райондин медицинадин хиле зегьмет чIугвазвай ксар тариф авуниз лайихлу я, — лагьана ада. — Куь пешекарвилин дережадихъ ва везифайрив жавабдарвилелди эгечIунихъ чун инанмиш хьана. Коронавирусдин азар чкIанвай вахтунда куьне суткада кьиляй-кьилиз, югъ-йиф талгьана, инсанрин сагъламвал ва уьмуьр хуьн патал зегьмет чIугуна. Им халис игитвал къалурун я. ТIугъвалдин вахтунда медицинадин са къуллугъчидини вичин везифайрикай кьил къакъуднач. Заз куь коллективда авай сада-сад эвез авунин хьтин хъсан адет ва гьуьрметлувални къейд ийиз кIанзава. Гьа ихьтин хъсан ерияр къенин юкъузни хуьн герек я. Къе чаз виридаз четин я. Украинада чи уьлкведи военный махсус серенжем кьиле тухузва. Ана чи райондай саки 200 касди иштиракзава. Кризисдин шартIара вири хилериз зарар хьанва, иллаки — экономикадиз. Амма государстводи санкцийрин заланвал, четинвал агьалийри гьисс тавун патал чалишмишвалзава. Чна уьлкведин руководстводихъ галаз рейсадвал къалурзава. Четин и шартIара медицинадин хиле зегьмет чIугвазвай ксарин виликни жавабдар везифаяр акъвазнава. Медработникрин кIвалахдилай неинки инсанрин сагъламвал, гьакI райондин яшайишдин дережани аслу я.
Хазран Кьасумов
