23-27-сентябрдиз Махачкъалада, Дагъустандин гьукуматдин медицинадин университетда, “Дагъустандин медицинадин образованидин ва здравоохраненидин гьафте” лишандик кваз чIехи форум кьиле фена. Ихьтин гегьенш мярекат республикада сифте сеферда яз ДГМУ-дин руководстводи РД-дин здравоохраненидин министерстводихъ галаз санал (РФ-дин здравоохраненидин куьмекни галаз) тешкилна.
Мярекатдин сергьятра аваз здравоохраненидин хилез талукь милли проектар кьилиз акъудунин, медицинадин рекьяй гузвай куьмекдин ери хкажунин, сад тир къайдаяр кардик кутунин, пешекарар гьазурунин важиблу месэлаяр веревирдна. Са шумуд юкъуз кьиле фейи форумдин кIвалахда пешекар духтурриз чпин тежрибадикай ихтилатардай, сада-садаз цIийивилерикай хабар гудай мумкинвал хьана. Форумдин майданрал вичин метлеблу доклад Махачкъаладин “Астрамед” клиникада кIвалахзавай акушер-гинеколог, ДГМУ-дин аспирантка Наида Уружевадини раижна. Алакьунар авай духтурди дишегьли сифте сеферда ва адалай гуьгъуьнизни руфунал залан хьайила, бубадинни дидедин иви сад-садав кьан тийизвайла, аялдин сагъламвилихъ галаз алакъалу четин гьалар гьикI арадай акъуддатIа, гьадакай метлеблу ихтилатар авуна.
— Перинатальный медицинадин рекьяй хейлин агалкьунар хьанва-тIани, аялдинни дидедин ивидин группаяр тафаватлубур хьуникди арадал къвезвай кьерехдин ва таза аялдин гемолитический азардин месэла чи уьлкведа тамамвилелди гьялнавайди яз гьисабиз жедач, — лагьана Н.Уружевади. — Ивияр сад-садав кьан тийизвайбур хьуникди арадал къвезвай (гемолитический) азардин лишанар РФ-да тахминан 0,6 процентдин таза аялрик акатзава. Ихьтин азардикди аялар рекьизвай дуьшуьшарни тIимил жезвач.
Духтурди къейд авурвал, умуми резус-изоиммунизациядин профилактикадин серенжемар вахтунда кьабул тавуртIа, кьерехрик (зородыш) акатзавай азардин дережа агъузиз хьун мумкин туш. Ада азардин вилик пад атIуниз, сагъар хъувуниз талукь яз кьилиз акъудна кIани серенжемрикай галай-галайвал ихтилатна. Кьерехдин гемолитический азар сагъардай нетижалу къайдаяр алай вахтунда малум туш. Гьа са вахтунда ада форумдин иштиракчияр перинатальный медицинадин тарихда агалкьунралди менфят къачузвай къайдайрихъ галазни танишарна.
К.Ферзалиев
