Агьалияр хъвадай целди таъминарунин программадин гьисабдай республикадин бюджетдай алава яз ахъайнавай такьатрихъ Кьурагьрин хуьре цин линияр туькIуьр хъувунин кIвалахар кьиле физвай гьалдихъ галаз таниш жез РД-дин Халкьдин Собранидин Комитетдин председатель Анна Безрукова, РД-дин Халкьдин Собранидин депутат Руслан Абдусаламов, РД-дин Минстройдин къуллугъчи, РД-дин Гьукуматдин заказчикдин векил Насруллагь Амайгьажиев, РД-дин Минэкономразвитиядин инвестицийрин управленидин пешекар Гьасан Мегьамедов, “Элитстройгрупп” ООО-дин председатель Исамудин ТIагьиров, “Хунзахское СЭУ” ОАО-дин инженер-генподрядчик Гьажимурад Муртазаев, целди таъминарунин рекьяй пешекар Гьуьсейн Нажмудинов атанвай.
Муниципалитетда совещание тухвайдалай гуьгъуьниз мугьманар цин линияр тухунин кIвалахдихъ галаз таниш хьана, абуру Кьурагьрин хуьруьн жуьреба-жуьре магьлейрин агьалийрихъ галаз суьгьбетарна, целди таъминарунин рекьяй пешекаррин ва хуьруьн бязи агьалийрин теклифрихъ яб акална.
Абур гьакIни Вилен кIама авай цин чешме алай чкадал фена ва инай цин линия тухунин фикиррихъ галаз таниш хьана.
Абурухъ галаз кIвалах кьиле физвай чкайрал Кьурагь райондин кьил Замир Азизов, райондин Общественный палатадин председатель Фахрудин Мирзоев, райадминистрациядин эцигунрин ва архитектурадинни ЖКХ-дин векил Шамил Мусаев, “Курахское ЖКХ” МУП-дин директор Мурад Османов ва масабур фенвай.
Хуьруьн агьалийри, пешекарри чпин фикирар лагьайдалай ва теклифар гайидалай гуьгъуьниз мугьманри талукь серенжемар кьабулдайди хиве кьуна.
Фаида Мегьамедова
