31-декабрдиз Ахцегьрин тарихдинни край чирдай музейдин «Женгинин Баркалладин» залда «Семье погибшего защитника Отечества» – рикIел аламукьдай лишан гунин мярекат кьиле фена. Вирироссиядин ветеранрин «Женгинин стхавал» тешкилатди, Ватан хуьнин буржи тамамардайла, игитвилелди телеф хьайи аскердин хизандиз гузвай и кьетIен шабагьдин чин пата кьве кьил алай лекь атIанва. Шикилдин кIаник «честь, слава, братство» гафар алай лент ква.
Мярекатда Ватан патал чан гайи жегьил игит офицер Ильясов Тамерлан Наримановичан диде-буба, багърияр, райондин жемиятдин тешкилатрин векилар ва, музейдиз тамашиз атана, и мярекатдал ацалтнавай ксар авай. Сифте гаф Ахцегьрин музейдин директор, РД-дин культурадин лайихлу къуллугъчи Агьмед Дагъларов рахана.
– Гьуьрметлу юлдашар, Ватан патал вичин жегьил чан къурбанд авур игит Тамерлан Ильясов къе чна нубатдин сеферда рикIел хкизва, кьил агъузна, икрамзава кьегьал хва тербияламишай диде-бубадиз, – хажалат чIугунин лишан яз, са декьикьада кисна акъвазайдалай кьулухъ лагьана райондин Жемиятдин палатадин председатель Шемсидин Арухова. – ГьикI, гьихьтин ирс, гел тазва инсанди чилел вичелай кьулухъ – гьам важиблу я. Тамерлана душмандихъ галаз женгина Ватандин азадвал, чи ислягь гележег патал чан къурбандна. Рагьмет хьуй!
Рафик МЕГЬАМЕДОВ, Ахцегь, Докъузпара, Рутул районрин уртах РВК-дин комиссар. – Кьиле США аваз, НАТО-дин уьлквеяр, Украина гъилик авуна, Россия зайифариз алахънава. Душманрин чIулав мурадар кьилиз акъатдач. ЦIийи нацистрихъни фашистрихъ галаз дяведиз къарагънава чи уьлкве. Игитвилелди женг чIугуна викIегь офицер Тамерлана. Адаз рагьмет хьурай, диде-бубадиз сабурар гурай! Игитдин диде-бубадин гуьгьуьл къачунин мярекатдин себебкар РФ-дин «Женгинин стхавал» тешкилатдин райондин хилен председатель Руслан Сулейманов я, музейда Тамерланаз махсус экспозиция ачухнавай Агьмед Дагъларовни пара сагърай! Гьа ихьтин краралди чна акьалтзавай несил ватанпересвилин руьгьдаллаз тербияламишзава.
Руслан СУЛЕЙМАНОВ, Вирироссиядин ветеранрин «Женгинин стхавал» тешкилатдин Ахцегь райотделенидин председатель. – РикI къарсурдай и кар малум хьайила – (къуй Тамерлан Аллагьдин рагьметдик кваз хьурай, адан диде-бубадиз сабурар гурай) чна чи тешкилатдин республикадин руководствони хабардарна. Хизандин гуьгьуьл къачун яз, ингье анай лишанлу медаль рахкурнава. Адахъ Москвадин патав гвай тарифлу санаторийда игит офицердин диде-бубадивай пулсуздаказ кьве гьафтеда хъсандиз ял ягъиз жедай путёвкани гала. Къуй 2024-йисуз, дяве гъалибвилелди куьтягь хьана, чи кьегьалар сагъ-саламатдиз чпин кIвалериз хтурай!
Игит рикIел хуьнин мярекатдал Ахцегьрин 3-нумрадин юкьван мектебдин 4-классда кIелзавай Саидова Камилади, Тамерлан Ильясован экуь къаматдиз бахшна, урус чIалал кхьенвай (автор — Луиза Тагьирова) «Игит офицердиз» шиир устадвилелди кIелна. Эхирдай Т.Ильясован диде Наира Жалиловнади вичин хва рикIел хуьнай мярекатдин иштиракчийриз сагърай лагьана.
* * *
И йикъара Тамерлан Ильясов (кьейидалай кьулухъ) жемиятдин шабагь – «Дагъустандин халкьдин кьегьал» медалдиз лайихлу хьанвайвилин гьакъиндай хабар агакьна. Ам телеф хьайи лейтенантдин диде-бубадив Ахцегь райондин кьил Абдул-Керим Палчаева вахкана.
Дашдемир Шерифалиев
