23-мартдиз Сулейман-Стальский райондин Эминхуьре Кьиблепатан Дагъустандин школайрин 11-классра кIелзавай аялар патал “Лезги газетдин” редакцияди ва “ЛЕКИ” фондуни лезги чIалайни эдебиятдай олимпиада кьиле тухвана. И мярекатда зани иштиракна.
Квелди тафаватлу хьана ам амай адетдин олимпиадайрилай? И мярекатдихъ, аялрин чирвилер ахтармишунилай, абуруз къимет гунилай гъейри, маса терефар, кьетIенвилерни авай.
Сад лагьайди, ам экуьди, михьиди хьана. Ам тешкилай, кьиле фейи тегьерди мярекатдиз вичиз ихтибар къазанмишдай мумкинвал гана. Ам районра, гьатта республикадин дережадани тухузвай бязи олимпиадаяр хьиз, вичел шак гъидайди хьанач. Нетижаяр кьурдалай гуьгъуьниз аялриз, муаллимриз кхьей кIвалахриз, ахъайнавай гъалатIриз килигдай ихтиярарни авай.
Кьвед лагьайди, олимпиада-дин иштиракчийрихъ галаз Сулейман-Стальский райондин кьил, филологиядин илимрин кандидат Н.Абдулмуталибов, алим М.Къадимов, алим ва шаир Ф.Нагъиев, яратмишзавай интеллигенциядин маса векилар гуьруьшмиш хьуни а мярекатдин дережа мадни хкажна.
Пуд лагьайди, олимпиада тухун патал чара авунвай майдандин иесийрин, райондин образованидин управленидин, Эминхуьруьн школадин коллективдин къайгъударвал кьетIенди хьана. И школадин коллектив, ашпаз ФатIима Османовадилай гатIунна, директор Рагьман Салмановичалай хкечIна, лезгийри лугьудайвал, мугьманрин къуллугъда са кIвачел акъвазна. Нисинин вахтунда чими хуьрекар гун тешкилна, идалди абуру чи миллетдиз хас ери тир мугьманпересвал къалурна-.
Санлай къачурла, олимпиада лап вини дережада аваз кьиле фена. Ам и саягъда кьиле финин кьилин себебрикай сад ватанпересвал, садни, зи кьатIунрай, чи чIалан гафарганра, лезги чIалан гьебейра “лезги намус” лугьудай кьве гаф хьун я. Къуй а ерияр чи миллетдин векилрин ивида мадни артмиш хъурай! Гьам фяледин, гьам лежбердин, гьам алимдин, гьамни регьбердин!
И мярекатдик кьил, къуьн кутурбуруз, ам кьиле тухвайбуруз баркалла!
Сейфудин Шагьпазов,
Гелхенрин хуьр
