Дяве. Гьикьван рикIиз къайи гаф тушни! Ватан патал чанар гайи игитрин тIварар чи рикIелай фидач. Уьтквем рухвайрини рушари чи уьлкведин тарихда рикIелай тефидай гел туна. Ахьтинбурукай сад мегьарамдхуьруьнви алим Мегьамед Гьажиеван чIехи хва Гьажиев Шагьабудин тир.
Ада Бакуда нафтIадин институт агалкьунралди акьалтIарна. И вахтунда Советрин Союздал душманди гьужумна. Шагьабудин Мегьамедовичаз Яру Армия нафтIадин продуктралди таъминарна кIанзавайди, нафт хкудун патал са-вадлу пешекарар герекзавайди чизвайтIани, ам са къуватдивайни далу пата хуьз хьанач, хуьруьзни хтун тавуна, Бакудай фронтдиз рекье гьатна.
Партиядин член, савадлу офицер Шагьабудин Гьажиева душмандихъ галаз саки кьиляй-кьилиз жуьрэтлувилелди женг чIугуна, амма Гъалибвилин югъ акун адаз кьисмет хьанач. Дяве акьалтIдалди са варз амаз, душмандин гуьлледи адан уьмуьр кьатIна.
Адалай инихъ 76 йис алатнава, амма гъурбатда телеф хьайи къагьриман хцин тIвар мукьва-кьилийрин, ам чидайбурун рикIелай алатдач.
Алай аямдин мумкинвилерикай менфят къачуналди, чаз адакай ихьтин малуматар жагъана. 1915-йисуз дидедиз хьайи Шагьабудин Гьажиев Баку шегьердин Дзержинский райондин военкоматдай 1941-йисан июлдиз фронтдиз рекье туна. Ада Украинадин 1-фронтда къуллугъна. Танкариз акси яракьдин наводчик тир Гьажиева гзаф женгера иштиракна, душмандин танкар ва аскерар тергна.
Гьажиеван эхиримжи женг Польшадин Вроцлав шегьер патал кьиле фена. Душмандин танкарин гьужумдиз жаваб гудайла, Гьажиева фашистри пулеметдай чи аскерриз цIай гузвай дзот кукIварна. Какахьай женгина пуд немс кьена, адал вичелни залан хер хьана.
Шагьабудин Гьажиев Польшадин Вроцлав шегьерда, ракьун ва шегьре рекьерин арада, кучукнава. Адахъ Ватандин дяведин I дережадин орден авай.
1945-йисан 25-январдиз вичин буба Гьажиев Магьамедаз кхьей кагъазда Шагьабудина вич, кIвачел хер хьана, Львов шегьердин госпиталда къатканвайдакай лугьузвай. Хирер сагъ хъхьайла, ам мад фронтдиз рекье гьат хъувунай.
Гьайиф хьи, мад адакай са делилни авач, шикил кьванни амач. Ватандиз, халкьдиз вафалувилин чешне яз, ам эбеди чи рикIера амукьда.
Р.Гьажиева,
Мегьарамдхуьруьн 1-нумрадин юкьван школадин
лезги чIаланни литературадин муаллим
