Украинадин вакъиайрикай
И йикъара зун Каспийск шегьерда виливни хуьн тавур мярекатдин шагьид ва иштиракчини хьана. Ина яшамиш жезвай миграгъвияр тир Загьироврин кIвализ хва, Донбасс украинви нацистрикай-фашистрикай михьи авун патал кьиле тухузвай махсус серенжемдин иштиракчи Шамгьур, частунин командованиди рухсат гана, диде-бубадал кьил чIугваз хтанвай. Дяведай хва сагъ-саламат яз хтайла, гьикI шадвалдач!
Шамгьурахъ галаз санал гьадаз хьиз рухсат ганвай са десте женгчияр хтанвай. Гьакьван залан женгера сифте йикъалай (24-февралдилай инихъ) санал иштиракзавайбур, вилик жергеда хьайибур. Гарарини къаяри, марфари гатанвай чинри, гьеле тваз агакь тавунвай чуруйрини спелри абуруз кьисмет хьанвай рекьерин сертвиликай, имтигьанрин заланвиликай лугьузвай.
Абур зал кIвалив ахгакьай сифте юкъуз гьалтна. Шикилда, чапладихъай эрчIи патахъ: Ширинбег Абдуллаев (Кьурагьай), сержант, отделенидин командир, Шамгьур Загьиров (Миграгъай), матрос; Аккад Ремиев (Хив райондин Хъукьварин хуьряй) старший сержант, отделенидин командир; юкьвавайбур — багърияр (М.Жалилов, А.Саидов, А.Загьиров); Имрат Магьмудов (Ярагъ-Къазмайрин хуьряй), сержант, отделенидин командир; Заур Гьабибуллаев (СтIал Сулейманан райондин Герейханован хуьряй, 1-отделенидай), сержант, отделенидин командир; Султан Мегьамедов (Къайтагъ райондин Маджалис хуьряй), сержант, отделенидин командир. Санлай — са взвод.
Хизандин мярекат хьуниз килигна, иниз пата-къерехдай маса ксариз теклифнавачир, анжах лап талукь мукьва-кьилийриз хабар хьанвай. Жегьилар гьеле вири чпин багърийрин патав ахгакьнавачир.
Суьгьбетрин вахтунда чир хьайивал, и дестеди Запорожьеда Сладкое, Малиновка, Ольгинка, Никольск, Владимировка, Благодатное хуьрер, поселокар, Бердянск шегьер азад авунин женгера кьегьалвилер къалурна. Чкадин агьалийриз-яшлубуруз, ялгъузбуруз, аялризни дидейриз, хирер-кьацIар хьайибуруз, саламат чкайриз акъудиз, Россиядин шегьеррай рекье твазвай куьмекдин шейэр — недай суьрсетар, яд, дарманар, пек-партал — вирибурув агакьариз, шартIар арадал гъизвай. Донбассвийри чи рухваяр-кьегьалар фадлай вилив хуьзвай, фашистрин-вагьшийрин зулумар, гъейратсузвилер, чиркинвал эхиз жезмачир.
Къецепатан ампайри яракьралди, пуларалди руьгьламишзавай угърашри, чи аскеррин гужлувал, викIегьвал акурвалди, чпин яракьарни, суьрсетарни гадариз, кьил хуьз гьерекатзава. Гагь-гагь чеб лап къуьрер хьиз къалурзава. Амма чинеба, гзаф квартирайрин кIвалерай, подвалрай, аялрин бахчайрайни мектебрай (вилив хуьн тийир чкайрай) чибуруз гуьлле гузва, гьайиф хьи, гьавиляй хейлин хкатунар, хер-кьацI хьайибур жезва.
Рухсатдиз санал хтанвай жегьилри Бердянск шегьердиз мукьва Благодатное хуьр азаддайла, душмандиз ягъун кьуна. Йифен вахтунда еке десте гьалкъада туна, хейлинбур телефна, катиз алахъайбур рей гуниз мажбурна. Яракьринни суьрсетрин еке базани къакъудна… И кьегьалвиляй командованиди тафаватлу хьайи вирибуруз диде-бубайрин патав рухсатдиз хъфидай мумкинвал гана. Государстводин шабагьризни къалурнава…
* * *
Са шумуд гаф хуьруьнви, хтул Шамгьуракай. Адан буба Загьиров Агъакъули вичин саки вири жегьил уьмуьрда Каспийскдин 5-нумрадин СМУ-да эцигунрин устIар, диде Лариса алишверишдин хилен къуллугъчи я. Шамгьур чIехи авур баде Селми Миграгъа гзаф аялрин диде, Ватандин ЧIехи дяведин ветеран, дидедин рекьяй чIехи буба Саидов Мегьамед дяведай хурудал женгинин 4 орден алаз, Гъалибвал гваз хтай кьегьал тир…
Шамгьура Каспийскдин 1-нумрдин юкьван школа акьалтIарна, Астраханда гьуьлерин флотда къуллугъна. 2005-2007-йисара. Матрос яз хтайдалай кьулухъ ада Каспийскда, 414-нумрадин гьуьлуьн пехотадин батальонда икьрардалди къуллугъ давамарна. И девирда ада, контрактник яз, Сирияда ва Суданда (Африкада) кьиле фейи хейлин серенжемрани уьтквемвилелди иштиракна…
Мярекатдин эхирдай женгчийри шикил ягъун ва, “Лезги газет” кIелзавай вирибурув чими саламар агакьарун тIалабна. Жегьилрихъ спортдинни чирвилер къачунин рекьера агалкьунар хьана кIанзавайди къалурна. ЦIийи жуьредин яракьри, техникади, технологийри хъсан чирвилер истемишзава, къейдзава женгчийри.
Ял яна, жегьилар мад чпин частуниз хъфида, гьахъвал, азадвал, чи Ватандин саламатвал патал женгер давамарда. Донбасс хуьнин махсус серенжем кьилиз акъудна хкведа! Къуй терг хьурай душманар, чи кьегьал рухваяр вири саламатдиз хтурай!
Мерд Али Жалилов,
РФ-дин ва РД-дин культурадин
лайихлу работник, зегьметдин ветеран
