Гьикьван гьайифдин, мусибатдин кар ятIани, дяведин махсус серенжемда Украинадин фашистрихъ, миллетбазрихъ галаз женгера чи ватанэгьлиярни телеф жезва. Командирри вилик эцигзавай тапшуругъар абуру викIегьвилелди, жуьрэтлувилелди тамамарзава, душман Россиядин чилелай чукурзава.
Дяведин махсус серенжемда республикадин вири районрай кьегьал рухвайри иштиракзава, гьа гьисабдай яз — Кьиблепатан Дагъустандин районрайни. И йикъара Дербент шегьердин администрацияда дяведин махсус серенжемда телеф хьайи аскеррин диде-бубайрив «Жуьрэтлувиляй» орденар вахкуниз талукьарнавай гуьруьш кьиле фена.
Администрациядин кьил Ханлар Пашабегова игитрин хизанриз рикIин сидкьидай башсагълугъвал гана ва гьакIни лагьана: «Куь рухвайри, са куьнихъайни кичIевал авачиз, чи уьлкведин итижар хуьн патал дирибашвилелди женг чIугуна, и пак кар патал чпин жегьил чанар къурбандна. Абурун тIварар ва кьегьалвилер гьамиша чи рикIера амукьда. Абур несилриз ватанпересвилин чешнеяр яз амукьда».
Муниципалитетдин регьберди къейд авурвал, шегьердин администрацияди дяведин махсус серенжемда авайбурун гьакъиндай датIана къайгъу чIугвазва. Рухваяр, гъуьлер телеф хьайи хизанриз вири патарихъай лазим куьмекар гузва.
Х. Пашабеговани шегьердин собранидин председатель Гьасан Мирзоева Мурад Магьмудован, Наби Набиеван, Тагьир Набиеван, Азим Рамазанован, Техрам Рустамован, Бедал Шамхалаеван диде-бубайрив ва уьмуьрдин юлдашрив «Жуьрэтлувиляй» орденар вахкана.
* * *
Гьа ихьтин мярекат Мегьарамдхуьруьн райондин администрациядани кьиле фена. Ана администрациядин къуллугъчияр, военкоматдин комиссар ва Ярагъ-Къазмайрин хуьруьн администрациядин кьил авай. Абуру гъуьл телеф хьайи Аманат Чубановадиз башсагълугъвал гана ва хизандиз гьи рекьяй куьмек герекзаватIа, хабар кьуна.
Райондин администрациядин кьил Нариман Эфендиева дяведин махсус серенжемда телеф хьайи аскер Шакир Чубанован «Жуьрэтлувиляй» орден адан уьмуьрдин юлдаш Аманат Чубановадив вахкана.
* * *
Дербент райондин администрациядин кьил Эльман Аллагьвердиев Белиж поселокдин администрацияда отпускдиз хтанвай дяведин махсус серенжемдин иштиракчи, батальондин командир подполковник Артур Имамкъулиевахъ галаз гуьруьшмиш хьана.
Гуьруьшдин вахтунда офицерди поселокдин агьалийрик секинсузвал кутазвай са шумуд месэла къарагъарна. ИкI, юкьван школадин патав «РикIел хуьнин багъ» кутун лазим тирдакай, поселок вахт-вахтунда ва атIунар авачиз электроэнергиядалди таъминаруникай ва яшайишдин бязи месэлаяр гьялуникай ихтилат авуна. Эльман Аллагьвердиева жавабдарвал хиве авай къуллугъчийриз тапшуругъар гана ва и месэлаяр гьялунал вичи гуьзчивалдайдакай лагьана.
Абад Азадов
