Алатай гьафтеда Дагъустан Республика­да «Ягуар» тIвар алаз арадал гъайи ОМОН-дин 27 йис тамам хьуниз талукьарнавай мярекатар кьиле фена. Ана Рос­гвардиядин чкадин Управленидин начальникдин везифаяр вахтуналди тама­марзавай полковник Георгий Котова, адан заместитель, полициядин полковник­  Арсен Абдуллагьова, къуллугъдин ветеран — 1998-2013-йисара отряддин командирдин везифаяр кьилиз акъудай по­ли­циядин отставкада авай покловник Мегьамедгьажи Байсултанова иштиракна.

«Ягуар» ОМОН-дин командир, полиция­дин­ полковник Иса Мегьамедова къейд авурв­ал, отряд арадал атана алатнавай 27 йи­сан вахтунда ам четин рехъ фенва. Зегьмет чIугвазвай къуллугъчийрин гьакъисагъ зегьметдин нетижада, вири четинвилериз дурум гуналди, къенин юкъуз ам женгинин баркаллу тарих авай подразделенидиз элкъвенва.

— Отрядди республикадин ва санлай уьл­кведин хатасузвал таъминарунин къаравулда акъвазун давамарзава. Подразделенида зегьмет чIугвазвайбуру неинки махсус серенжемра иштиракзава, гьакI ракьун рекьин, цавай ва целай фидай улакьра тахсиркарвилерин вилик пад кьунин жигьетдайни еке кIвалах тухузва. Отряддин къуллугъдинни женгинин кIвалахда хъсан нетижаяр къазанмишиз алакьнава, везифаяр инлай кьулухъни намуслудаказ кьилиз акъу­диз гьазур я, — къейдна командирди.

Дагъустандин (чкадин) управленидин кьи­ле авай ксарин тIварунихъай къуллугъчийриз  лишанлу югъ Г.Котовани тебрикна ва лагьана: «Куь отрядди Управленидин махсус вири подразделенийрин арада лайихлу чка кьазва. Куьне гьар юкъуз тахсиркарвилерихъ галаз женг чIугунин, общественный хатасузвал таъминарунин ва къайдаяр хуьнин крарик еке пай кутазва. Кьилиз акъудзавай къуллугъдай ва гьакIни женгинин дуствилин баркаллу адетар хуьнай куьн сагърай. Ветеранрин тIварунихъни заз чи­ми келимаяр лугьуз кIанзава. Абуру чпин къуллугъдин ва уьмуьрдин тежриба жегьилрив агакьарзава, чаз абур бе­дендизни руьгьдиз мягькембур яз тербияламишунин крара куьмекзава».

Мярекатдал рахай­ от­ряд­дин виликан командир М.Бай­сул­та­но­вани къуллугъзавай­бурун тIва­ру­нихъ чими келимаяр лагьана, ганвай кьинез вафалувал хуьниз ва Ватандин мягькем къалхан хьуниз эвер гана.

Гуьгъуьнлай кIватI хьанвайбуру къуллугъдин везифаяр кьилиз акъуддайла, телеф хьайи ксариз хкажнавай мемориалдал цуьквер эцигна, абурун экуь къаматар рикIел хкунин лишан яз, са декьикьада кисна акъвазна.

Суварин ва лишанлу йикъарихъ галаз алакъалу яз, эхирдай хъсан адет кьилиз акъудна  — кIвалахда тафаватлу хьайибурув шабагьар ва къиметлу пишкешар вахкана.

Рагнеда Рамалданова