12-декабрдиз Дагъустан Республикадин Кьилин везифаяр вахтуналди тамамарзавай Владимир Васильева РФ-дин оборонадин министерстводин военный полициядин Кьилин управленидин начальник Владимир Ивановскийдихъ галаз санал Махачкъаладин аэропортуна Сирияда махсус тапшуругъар кьилиз акъудна хтанвай кьилдин мотострелковый бригададин военный полициядин батальондин аскерар шадвилин гьалара къаршиламишна.

Республикадин Кьилин ва Гьукуматдин Администрациядин пресс-къуллугъди “Лезги газетдиз” хабар гайивал, мярекатда Кьиблепатан военный округдин кьушунрин командующийдин заместитель Андрей Гурулева, умуми кьушунрин 58-армиядин командующий Евгений Никифорова, РД-дин Халкьдин Собранидин Председатель Хизри Шихсаидова, РД-дин Гьукуматдин Председателдин везифаяр вахтуналди тамамарзавай Абдусамад Гьамидова, РД-дин Кьилин ва Гьукуматдин Администрациядин руководитель Владимир Иванова, СКФО-да РФ-дин Президентдин патай тамам ихтиярар ганвай векилдин аппаратдин РД-да авай кьилин федеральный инспектор Алексей Горлова, РД-дин Хатасузвилин Советдин секретарь Абдулмуслим Абдулмуслимова, РД-дин Гьукуматдин Председателдин замес­тителрин везифаяр вахтуналди тамамарзавай Рамазан Жафаровани Шамил Исаева, РД-дин военный комиссар Дайтбег Мустафаева, Дагъустандин муфтий, шейх Агьмад гьажи Абдуллаева, Дагъустандиз хтанвай военныйрин мукьва-кьилийри иштиракна.

Вичин рахунра Владимир Васильева, международный терроризмдин аксина кьабулзавай серенжемрин сергьятра аваз ислягь гьалар арадал гъидай месэлаяр гьялунихъ авай еке важиблувал къейдна.

“Вири саламатдиз ватандиз хтунай заз командирриз сагърай лугьуз кIанзава. Накь куьн чи Главнокомандующийди тебрикна. Ада куьн аквадай вахт жагъурна, куьне тамамарнавай тапшуругърин кье­тIенвал къейдна ва квез виниз тир къимет гана.

Ина, Дагъустандин чилел, куьне Сирияда авунвай кIвалахрин важиблувал мадни кьатIузва. 1999-йисуз международный терроризмди Дагъустандин мягькемвални ахтармишайди я. Жуьреба-жуьре миллетрикай ибарат Дагъустандин халкь терроризмдин аксина кьетIидаказ экъечI­на. Гьа чIавузни Владимир Путина террористрин вилик пад кьунин карда иштиракай гьар садаз сагърай лагьанай.

Хейлин йисар алатнава. Чахъ гила ма­са, къуватлу армия ава. Амма чи Прези­дент Главнокомандующий яз амукьзава. Ада чи армия, уьлкве, халкь виликди ту­хуз­ва.

Мукьвал тир шаркь пата кьиле фенвай эхиримжи вакъиайрай  Россияди вири дуьньядин майданда тухузвай сиясат гьи­кьван дуьзди ятIа ачухдиз аквазва. Адан тереф хуьдай союзникарни майдандиз экъечIза­ва”, — малумарна Владимир Васильева.

РФ-дин оборонадин министерстводин военный полициядин Кьилин управленидин начальник Владимир Ивановскийди рикIел хкайвал, батальонди 2017-йисан июндилай декабрдалди дяведин ва махсус тапшуругъар тамамарна.

“Батальондин аскерри чпел ихтибарнавай везифаяр, хсуси уьмуьр хаталувилик кутуна, чешнелудаказ кьилиз акъудна. Дяведин агъур шартIара абурулай неин­ки везифаяр тамамариз, гьакIни сагъ-сала­матдиз ватандиз хквез алакьна. Аферин чпиз!” — лагьана Владимир Иванов­скийди.

КIватI хьанвайбурун вилик Дагъустандин муфтий Агьмад гьажи Абдулаевни рахана.

“Сирия чун паталди стхавилин, мусурман уьлкве я. Ана Россиядин хейлин агьа­лиярни яшамиш жезва. Дяведин гьерекатар куьтягь хьунихъ галаз санал Сирияда икьван геждалди вилив хвейи ислягьвални архайинвал жедайдак умуд кутазва”, — къейдна муфтийди.

Мярекатдин эхирдай военный къуллугъчийрив Россиядин оборонадин министерстводин ведомстводин ва Дагъустан Республикадин государстводин шабагьар­ вахкана.

«Лезги газет»