Эхиримжи вахтара яшайишдин жигьетдай менфятлу крар кьилиз акъудунал машгъул жезвай жемиятдин тешкилатар артух жезва. Гъурбатда яшамиш жезвай, чпихъ мумкинвилер ва тешкилатчивилин алакьунар авай савадлу ватанэгьлийри, рейсад фикирдалди санал кlватl хьана, чпин хайи ерияр абадвилихъ тухунин кардик пай кутазва.
1980-йисуз Кьурагь райондин Кьепlиррин хуьре дидедиз хьайи Гьасан Гьайдарович ГЬАСАНОВНИ мергьяматлувилинни баркаллувилин крарик кьил кутунвайбурукай сад я. 1997-йисуз Кьурагьрин юкьван мектеб, 2002-йисуз Махачкъалада юстициядин министерстводин патав гвай праводин академия куьтягьай жегьил пешекарди вичин зегьметдин рехъ Дагъустандин хуьруьн майишатдин НИИ-да юридический рекьяй меслятар гудайдан къуллугъдилай гатlунна. Кьилин образование къачурдалай кьулухъ ам Москвадиз куьч хьана, ина ада са жерге тешкилатра ва РФ-дин юстициядин министерстводин хиляй гьукуматдин къуллугъдал кlвалахна.
Гьасан Гьасанов мергьяматлувилин “Абад Кьепlир” ва “Леки” фондарин директор я. “Абад Кьепlир” фонд хайи хуьр абадунин важиблу, менфятлу проектрал машгъул жезва.
“Зи фикирдалди, вичин аял вахтар кечирмишай хайи ватан кlани гьар са касди, са гьихьтин ятlани хъсан, регьимлу кар ийиз кlанз, гележегда адан абадвиликайни фикирда”, — лугьузва Гь.Гьасанова, “Абад Кьепlир” фонд арадал гъуникай хабар кьурла.
Гьелбетда, “Абад Кьепlир” анжах и хуьр патал мергьяматлу крар кьилиз акъудунал машгъул жезва. Амма Гьасан Гьасанован регьбервилик кваз арадал гъанвай “Леки” фондунин сергьятар, тухузвай кlвалахрин хилер гегьеншбур я.
Ялавлу ватанперес Гь.Гьасанов кьетlен тежриба авай юрист, 2010-йисалай сиясатдин илимрин кандидат, консалтинговый тешкилатдин регьбер ва жемиятдин крарин активист я. Ада гзаф вахтунда Одинцоводин гуманитарный университетдин государстводин, муниципальный управленидин кафедрада тарсар гана.
Гьасан Гьасанова Москвада яшамиш жезвай жегьил кьепlирвиярни мергьяматлувилин фондунин крарал желбзава. Ада рикlел хкизвайвал, 2015-йисан сифте кьилера 16 жегьил Москвада гуьруьшмиш хьана, фонд арадал гъунин месэла кьетlна. Гьа и гуьруьшдал фондунин тlварни тайинарна. Гуьгъуьнлай соцсетра авай махсус кlватlалра датlана алакъада хьуникди хейлин месэлаяр са куьруь вахтунда кьилиз акъудна.
“Леки” фондунин сайтдай аквазвайвал, Гь.Гьасанов мергьяматлувилин крар кьилиз акъудуна тек туш. Ада жуьреба-жуьре хилерай кlвалахар вилик тухун патал вич хьтин ватанпересвилин руьгь авай жегьилрин десте арадал гъанва. “Леки” фондуни кьилиз акъудай са кьадар кlвалахрикай чна газетда чапнай.
Чи мурад сувабдин, регьимдин рекье зегьмет чlугвазвай Гьасан Гьасановахъ ва адан дестедихъ агалкьунар хьун я.
Куругъли Ферзалиев
