И йикъара Лезгистандин са шумуд хуьре диндин мярекатар кьиле фена: 10-майдиз, рагьметлу имам Мугьаммад Хидирован экуь къаматдиз бахшна, Хасавюрт райондин Къурушрин хуьре, гуьгъуьнлай Мегьарамдхуьруьн райондин КьепIир-Къазмайрал, 13-майдиз Мегьарамдхуьруьн райондин Хъартас-Къазмайрал диндин межлисар тешкилнавай. Анра РД-дин Муфтийдин заместитель Абдулла Аджимоллаева, Кьиблепатан Дагъустанда РД-дин Муфтийдин патай тамам ихтиярар ганвай векил Агьмад Гьарунова, Кьиблепатан Дагъустанда РД-дин Муфтиятдин марифатдин отделдин руководитель Шамил Омарова, са жерге лезги районрин, хуьрерин имамри, республикадин жуьреба-жуьре пипIерай мугьман хьанвай динэгьлийри иштиракна.
Мярекатрин сергьятра аваз жемятрин вилик рахайбуру диндин рекье вичин чан къурбанд авур Мугьаммад Хидирова тунвай ирсиникай, ада кьиле тухвай кIвалахрин терефрикай, рагьметлу имамдиз хас ерийрикай, Кьиблепатан Дагъустандин машгьур алимрикай, Рамазандин вацран важиблувиликай, халкьарин арада дуствал хуьникай, эдебдикайни ахлакьдикай, терроризмдикайни экстремизмдикай авай зарардикай ва месэлайрикай лагьана.
Межлисрин сергьятра аваз, медресайра кIелзавай аялри ва Заур Салигьова, Саид Гьамидова ва масабуру нашидарни кIелна.
Агьмад Гьарунова къейд авурвал, Аллагь рикIел гъизвай са межлисда иштиракуни къадагъа авунвай агъзур мярекатда иштиракунин нетижада жезвай вири гунагьар михьзава. И келимайри мад сеферда диндин жигьетдай кьиле тухузвай серенжемрихъ авай важиблувал субутзава.
Пак Рамазандин вацран вилик кьиле тухванвай и мярекатар берекат галайбур хьурай, чна хуьзвай сиверни гузвай садакьаяр Аллагьди кьабулрай. Амин!
Гьасан Амаханов, «Ас-салам» газетдин редактор
