Алай вахтунда Ахцегьрин тарихдинни край чирдай музейда “Ата бубайрин къванер” тIвар алаз бажарагълу художник, РФ-дин художникрин Союздин член Октай Алирзаеван яратмишунрин выставка давам жезва. Лезгийрин игитвилин “Шарвили” эпосдин 18-сувариз талукь яз тешкилай и выставка ачухунин мярекатда Гьукуматдин Председателди Сад лагьай заместитель Анатолий Къарибова, “Шарвилин” эпосдин суварин оргкомитетдин председатель ва общественный деятель Имам Яралиева, республикадин кьиблепатан территориальный округда РД-дин Кьилин патай тамам ихтиярар ганвай векил Энрик Муслимова, Ахцегь, Сулейман-Стальский районрин регьберри — Осман Абдулкеримова, Нариман Абдулмуталибова ва масабуру иштиракна.
Экспозицияда живопись, графика ва маса къайдайра чIугунвай 25 шикил ава. Тамашачийрин фикир, гьайиф чIугунивди, чи гадарнавай дагълух хуьрерин (бязибурукай амайди са къванер я, гьавиляй авторди выставкадин тIварни “Ата бубайрин къванер” эцигнава) амукьайрал желб жезва. Гьа са вахтунда экспозицияда чи тарихдиз, девирдин гьакъикъи гьаларизни гележегдиз умудлу вилералди килигиз тазвай шикиларни ава: “Къадим Ахцегьрин магьлейрин акунар”, “Зи сифте муаллим”, “Алия” ва масабур. Художник вичин хизанни галаз яргъал йисара Санкт-Петербургда яшамиш жезватIани, выставкадин шикилрай адан рикI хайи гъвечIи Ватандихъ кузвайди, ватанэгьлийрин агалкьунрал шадвалзавайди, халкьдин гьар йикъан къайгъуйриз шериквалзавайди аквазва. Итиж ийизвай ксариз вичин яратмишунрин рекьикайни экспозицияда авай шикилрин мана-метлебдикай художникди гьевеслудаказ суьгьбетзава.
— Ви яратмишунрин агалкьунрикай, гьелбетда, чун хабардар тир. Гила вахъ ва ви кIвалахрихъ галаз мукьувай таниш хьунал шад я. “Шарвили” эпосдин суварин гьуьрметдай Ахцегьа и выставка ачухуналди вуна яратмишунин зегьметдал машгъул чи амай ксаризни ватанпересвилин чешне къалурзава, сагърай! Бажарагълу ватандашрин хъсан фикира, теклифар кьил хушвилелди кьабулиз, алакьдай куьмекар гуз чун гьамиша гьазур я, — разивилелди лагьана Ахцегь райондин кьил Осман Абдулкеримова.
— Ахцегьа, заз кIелиз-кхьиз ва сифте яз гъиле яратмишунин къелемни кисть кьаз чирай багъри Ватанда, машгьур музейда, вични “Шарвили” эпосдин суварин юкъуз жуван яратмишунрин выставка ачухдай мумкинвал хьун — им зи яратмишунрин уьмуьрда лишанлу вакъиа я. Дугъри я, и выставкадик Шарвили пагьливандин къамат квач. Амма вичив рикIивай ва пара фагьумлувилелди эгечIна кIанзавай и кьетIен къамат арадал гъунал за фадлай кIвалахзава. Гьелелиг ам халкьдин вилик гъидай кьван тамамди хьанвач. Зи Шарвили хайи халкьдин къуллугъда акъвазиз гьазур викIегь, къанажагълу вири лезгийриз ухшарди я. Аллагьди гайитIа, эпосдин къведай йисан суварин зи выставкада квез ам аквада. Ахцегьа выставка ачухна, яратмишунрин кIвалахар итижлу тир районэгьлийрихъ галаз гуьруьш жедай мумкинвал гунай Ахцегь райондин руководстводиз, музейдин директор Агьмед Дагълароваз сагърай лугьуз кIанзава, — къейдна художникди.
Октай Алирзаев 1961-йисуз Ахцегьа милициядин офицер Алирзадинни математикадин тарсар гузвай Гуьлмейрам муаллимдин (рагьмет хьуй чпиз) гьуьрметлу хизанда хьана. ГъвечIи чIавалай шикилар чIугунал рикI алай гада диде-бубади умуми чирвилерин школадихъ галаз санал художественный школадикни кутазва. Аялдин кьетIен бажарагъ ана РД-дин культурадин лайихлу работник, РФ-дин художникрин Союздин член Жавид (Алиев) муаллимди кьатIузва. Адан теклифдалди Октая 1977-1981-йисара Махачкъалада Жемалан тIварунихъ галай художественный училищеда кIелзава. 1984-йисалай жегьил художникди вичин уьмуьр уьлкведин кеферпатан меркездихъ — Санкт-Петербург шегьердихъ галаз алакъалу ийизва. 1991-1997-йисара Октай Алирзаевича ана живописдин, скульптурадин ва архитектурадин И.Репинан тIварунихъ галай академияда графикадин факультет агалкьунралди акьалтIарзава. 2011-йисалай пешекар художникди ва муаллимди Санкт-Петербургдин культурадинни искусстводин колледжда ва 2014-йисалай дизайндин “Артфутуре” школада намуслувилелди кIвалахзава. Вичин инсанвилинни пешекарвилин ерийралди Октая кIвалахзавай коллективрин арада лайихлу гьуьрмет къазанмишнава.
Дашдемир Шерифалиев
