6-августдиз Кьурагь райондин Ашарин хуьре шейх Абдуллагь кьейидалай кьулухъ 100 йис тамам хьунихъ галаз алакъалу яз диндин межлис кьиле фена. Исаев Мегьамедшафидини Халикьов Хидирнебиди тешкилай и мярекатдиз вишералди инсанар атанвай. Къейд ийин хьи, ихьтин межлис са шумуд йис идалай виликни тешкилнай. Ана Дагъустандин саки вири миллетрин векилри иштиракнай.
Ашарин хуьр пIирералди, шейхералди, машгьур инсанралди девлетлу я. Алим, шейх Шамилакай надир поэма кхьей Ашай Рамазанни шейх Абдуллагь гьахьтин ксарикай я.
Шейх Абдуллагь аяндар, кераматар авай чIехи алим хьиз машгьур тир. Ам кьена са йис хьайила, хпуькьвийри кьил кутуна, атIай къванерикай адаз гуьмбет эцигна. Адал къуба алай. Эхиримжи йисара ам ракьуналди кIевна, зияратдиз элкъвена. Патав адан юлдаш Гуьлагъадиз эцигай гуьмбетни гва. А чка тарифлудаказ туькIуьрнава. Йифиз анал эквер кузва. Емишдин тарарни кутунва.
Шейхдиз талукьарнавай диндин межлис райондин имам Шамил Омарова кьиле тухвана.
Мярекатдал Дагъустандин муфтийдин Кьиблепатан Дагъустанда авай векил Магьди гьажи Абидов, шейхдин невеяр — Хидирнеби Халикьов ва Мегьамедшафи Исаев, Ашарин хуьруьн администрациядин кьил Али Алиев, и цIарарин автор, муаллим Мегьамед Мегьамедов, Къиргъистандай хтанвай мугьман Алим Жамалов, Къизляр райондин ЦIийи Орешевка хуьруьн имам Магьди — гьажи Апаев, Хпуькьрин мискIиндин имам Исамудин Агьмедов, Ашарин мискIиндин имам Къурбан Къурбанов ва масабур рахана, кьурагьви Сулейман Магьамдалиева нашидар кIелна.
Межлисдин эхирдай иштиракчийриз садакьаяр гана ва дадлу хуьрекар алай суфраяр ачухна.
Гьуьсейн Рамазан, Кьурагь район
