ЦIийи йисан суварин йикъара заз жува кIвалахай мектебдин коллективди муаллим Рагина Пашаевнадин уьмуьрдин юлдаш Арсен СВО-дай отпускдиз хтанвайдакай хабар гана. Гежел тевгьена, зун Арсенахъ галаз гуьруьшмиш хьана.
Къадимов Арсен 1981-йисуз Кьурагь райондин Штулрин хуьре муаллим Абдулгьамидан хизанда дидедиз хьана. Арсен гъвечIизмаз хизан Белиж поселокдиз эвичIна. Г. Лезгинцеван тIварцIихъ галай мектебдиз фейи гадади поселокдин пуд лагьай юкьван мектебдани кIелна ва Белиждин гимназияда цIуд лагьай класс акьалтIарна.
1999-йисуз Арсеназ армиядин жергейриз эверна. Кьве йисуз ада МВД-дин къенепатан кьушунра сифте стрелок яз Владимир шегьердин, ахпа стрелок-курсант яз Тула шегьердин, гуьгъуьнлай улакьдин командир яз Ростовдин областдин Казачьи лагеря поселокда авай частуна аскервилин буржи намуслудаказ кьилиз акъудна. Къазанмишнавай агалкьунриз килигна, адаз сержант, ахпа старший сержант чинар гана. 2000-йисуз ада Кеферпатан Кавказда кьиле фейи террористриз акси женгерин гьерекатра иштиракна. Региондин мулкарал кьиле тухвай терроризмдиз акси серенжемра тафаватлу хьайи А. Къадимов командованидин патай шабагьдиз лайихлу хьана.
2001-йисуз къуллугъдин вахт куьтягь хьайила, ам кIвализ хтана. Поселокда кIвалах жагъуриз алахъна. Гьар жуьре кIвалахар авуна. 2004-йисуз Чечен Республикадиз фена. Ана, икьрар кутIунна, гилалди къуллугъзава.
2008-йисуз А. Къадимов командованиди отделенидин командирвиле тайинарна. Бригададин тактикадин ученийра аскервилин буржи чешнелудаказ тамамарунай, къуллугъда чалишмишвиляй, женгиниз гьазурлухвиле къалурай активвиляй ва низамдай старший сержант А. Къадимов шабагьдиз лайихлу хьана.
2015-йисуз Вирироссиядин ветеранрин жемиятдин «Женгинин стхавал» тешкилатди «Чешнелудаказ аскервилин буржи тамамарунай ва, вири къуватар эцигна, Ватандиз къуллугъ авунай» адан агалкьунар гьуьрметдин шабагь гуналди къейдна.
2022-йисан февралдилай Къадимова Украинада кьиле физвай махсус серенжемда иштиракзава. Ада рикIел хкизвайвал, махсус серенжемда женгинин тапшуругъар тамамариз, адан отделение сифте Запорожьедин Орехово шегьердиз ракъурна. Ина ада вичин отделенидихъ галаз кIвалер, подвалар, промышленностдин карханаяр миллетчийрикай михьи ийиз хьана. Акси экъечIайбур чкадал тергна, амайбур есирвиле кьуна. Женгинин кIвалах тамамардайла, адан отделенида авай са аскердал хер хьана. Миллетчидиз жавабдин гуьлле гана, ам чкадал тергна. А. Къадимован отделениди Запорожьедин областдин маса хуьрерани, металлургиядин «Азовсталь» комбинатдани ихьтин везифаяр жуьрэтлувилелди кьилиз акъудна.
2022-йисан гатуз командованиди А. Къадимован отделенидиз Запорожьедин областдин Васильевка шегьердин кьил саламатдиз хуьнин тапшуругъ гана. Саки кьве йисуз абуру чпин вилик эцигнавай везифаяр намуслудаказ тамамарна. И вахтунда миллетчийри, вахт арадай физ, шегьердин кьил терг ийиз кIанз, пуд сеферда дронар ракъурна. Пуд дронни яна гадарна.
Алатай йисан ноябрдин вацралай А. Къадимова РФ-дин милли гвардиядин кьушунрин Кеферпатан Кавказдин Жукован орден авай военный округда къуллугъна. Алай вахтунда ада Агьмад-Гьажи Къадырован тIварцIихъ галай Росгвардиядин батальонда къуллугъ давамарзава.
Старший сержант А. Къадимов сад ва кьвед лагьай дережайрин «Чешнелудаказ къуллугъ авунай», «Кеферпатан Кавказдин женгерин гьерекатрин иштиракчи», «Махсус военный серенжемдин иштиракчи», «МВД-дин къенепатан кьушунрин 358-оперативный серенжемрин кьилдин батальондин 20 йис» медалрин, «Къуллугъдин отличник» лишандин сагьиб я.
А. Къадимова вичел тапшурмишай гьар са кар баркаллудаказ кьилиз акъудзава. 2024-йисан 13-декабрдиз Дагъустан Республикадин кьил Сергей Меликован указдалди А. Къадимоваз «Къалурай викIегьвиляй» медаль гана.
Уьмуьрдин юлдаш Рагина Пашаевнадихъ галаз санал хизанда цуьквер хьтин пуд рушаз тербия гузва.
Къагьриман Ибрагьимов
