10-октябрдиз «Дагестанская правда» газетдин майдандал тешкилнавай пресс-конференциядал икьрардин бинедаллаз военный къуллугъдал кьабулзавай Махачкъаладин пунктунин начальникдин везифаяр вахтуналди тамамарзавай капитан Салаватов Мегьамеджамил республикадин СМИ-рин векилрихъ галаз гуьруьшмиш хьана.
— Сифте нубатда лугьуз кIанзава хьи, РФ-дин оборонадин министерстводихъ галаз икьрар кутIунна гуьгьуьллубур военный къуллугъдал кьабулдай пункт Махачкъалада сифте яз ачухнава. ТахьайтIа, дагъустанвияр Астрахандиз физвайди тир. Анани икьрар къуватда гьатдалди кьвед-пуд варз жезвай, — лагьана М. Салаватова. — Гила пунктуниз атай касди арза кхьей пуд йикъалай ам военный къуллугъдал рекье твазва.
Пунктуниз республикадин вири шегьеррай ва районрай итимар къвезва ва абуру оборонадин министерстводихъ галаз са йисан икьрар кутIунзава. ЦIуд йисан икьрар кутIундай ихтиярни ава. Дагъустанвийри саки вирида са йис хкязава. Ахпа мадни къуллугъ давамариз кIанзавайбур ава.
Икьрар кутIуннавайбур Владикавказда кардик квай резервный батальондиз рекье твазва. Ана кьве гьафтеда вердишвилер къачурдалай гуьгъуьниз тайин тир частариз ракъурзава.
Салаватова лагьайвал, Украинада кьиле тухузвай махсус серенжемда иштиракна хтай хейлин викIегь гадайри мадни икьрар кутIун хъувуна ва Ватандин итижар хуьдай ашкъи авайди къалурна.
Пулуникай рахайтIа, СВО-да иштиракзавай аскеррив агъа кIанин кьадар мажиб яз 210 агъзур манат агакьзава. Идалайни алава яз, абуруз жуьреба-жуьре шартIариз килигна мадни пулунин такьатар гузва.
Офицерди малумарайвал, РФ-дин оборонадин министерстводин план 35 процентдин кьилиз акъуднава. Пунктуниз къвезвай инсанрин гьакъиндай кьитвал авач.
Абад Азадов
