Дагъустандиз РФ-дин Президентдин меслятчи, адан патав гражданвилин жемият вилик тухунин ва инсанрин ихтияррин рекьяй кардик квай Советдин председатель Валерий Фадеев мугьман хьанвай.
5-июлдиз Махачкъалада РД-дин Кьил Сергей Меликова адахъ галаз гуьруьш кьиле тухвана. Абуру Дагъустан вилик тухуниз, гьукумдин органринни жемиятдин арада алакъайриз талукь месэлаяр веревирдна. Гуьруьшдин вахтунда образованидин, туризмдин темайриз ва республикада кьилиз акъудзавай чIехи проектриз кьилди фикир гана.
Гьа и юкъуз Махачкъалада В. Фадееван, С. Меликован ва республикадин муфтий А. Абдуллаеван иштираквал аваз журналистрихъ галаз пресс-конференция кьиле фена. Абуру региондин ва федеральный СМИ-рин векилрин суалриз жавабар гана.
Суалар асул гьисабдай 23- июндиз Махачкъаладани Дербентда хьайи терактриз, Дагъустанда мусурман дишегьлийри никъаб алукIунал къадагъа эцигуниз, Дагъустандинни РФ-дин Президентдин патав гражданвилин жемият вилик тухунин ва инсанрин ихтияррин рекьяй кардик квай Советди санал кьиле тухузвай кIвалахдиз, мискIинра марифатдин месэлайриз гузвай фикирдиз ва маса темайриз талукьбур тир.
Пресс-конференциядикай гегьеншдиз РД-дин Кьилин сайтдай кIелиз жеда.
Чи мухбир
