Мергьяматлувал
Ярославлдин региондин “Лезги милли медениятдин автономия” тешкилатдин регьбер, “Термоклимат” ООО-дин генеральный директор, ФЛНКА-дин член Васиф Гьасанова СтIал Сулейманан кIвализ-музейдиз, вичин патай савкьат яз, 3 кондиционер маса къачуна.
ЧIехи шаирдин кIвалин-музейдин дараматдив кьадай кондиционерар “Русклимат” тешкилатди хкяна.
СтIал Сулейманан райондин кьил Нариман Абдулмуталибова, музейдин дирекцияди мергьяматлувал авур Васиф Гьасановаз рикIин сидкьидай чухсагъул лагьана. Райондин кьили В.Гьасанова Россиядин шегьерра милли меденият хуьнин рекье кьиле тухузвай кIвалахар къейдна.
В.Гьасанов кьиле акъвазнавай ЯРЛНКА-дин кIвалахдин асул макьсадрик лезги адетар, меденият хуьн ва еримлу авун, Ярославлдин областда авай лезгийрин арада хайи чIал машгьурун, чIал чирдай шартIар тешкилун, ватанэгьлийриз куьмекар гун акатзава. ЯРЛНКА-ди СтIал Сулейманан яратмишунриз талукь мярекатарни кьиле тухузва.
Къейд ийин, В. Гьасанова мергьяматлувилин крар идалай виликни авунай. Абурукай яз, рикIел хкин хьи, 2022-йис патал ада вичин ата-бубайрин хуьр тир Докъузпара райондин Къурушрин вири хизанриз “Лезги газет” кхьена. Сагърай вич!
«Лезги газет»
