СтIал Сулейманан тIварцIихъ галай лезги муздрамтеатрдин дараматдин фойеда, лезгийрин машгьур регьбер Гьажи Давуд Муьшкуьрвидикай Ширвандин хан хьайидалай инихъ 300 йис тамам хьуниз талукьарна, Дербент шегьердин художникрин живописдинни графикадин къайдада чIугунвай шикилрин выставка кьиле фена.
«Вахтунин часпарар» («Грани времени») лишандик кваз тешкилай выставкада Дербент шегьердин администрациядин культурадин, спортдин, жегьилрин сиясатдин крарай управленидин начальник Самиля Нажафовади, шегьердин собранидин депутат Айваз Алиханова, Женгинин баркаллувилин музейдин пешекар Гуьлпери Шабановади, Гьажи Давудан тIварцIихъ галай центрадин председатель Самур Алиева, шегьердин музыкадин училищедин, аялрин яратмишунрин школайрин директорри, педколледждин студентри, интеллигенциядин векилри, гьакIни искусстводал рикI алай шегьерэгьлийри иштиракна.
Мярекат кьиле тухвай Г. Шабановади тарихда кьетIен гел тур, кьушунрин викIегь регьбер, магьир сиясатчи, дерин фикир ва акьул авай, шаркь патан Кавказдин халкьарин азадвилин женгчи Гьажи Давудан уьмуьрдикай ва адан кьегьалвилерикай суьгьбет авуна. Ада вичин рахунра, гьа девирда халкьарин азадвал патал женгериз къарагъай дагъвийри хьиз, гила чи кьегьал рухвайри, махсус серенжемда иштиракуналди, Ватандин аслу туширвал хуьз къуллугъзавайди къейдна.
Выставкада гегьенш чка Мелик Агъабалаева чIугунвай Гьажи Давудан, адан женгинин юлдашар хьайи къазикъумухви Сурхай хандин, къайтагъви Агьмед хандин, цIахурви Али Султанан, къуткъашенви Ибрагьиман, Урусатдин император I Петрдин, Ирандин шагь II Тахмаспан, III Агьмед Султанан, Гуржистандин пачагьрин — IV Вахтанган ва II Константинан суьретри кьунвай. Шегьеррани хуьрера женгиниз къарагънавайбуру иштиракай ягъунрин сегьнейрикай чIугунвай шикилрини кIватI хьанвайбурун фикир желбзавай.
«Часпар» паюна Дербентдин алай аямдин художникри (Мегьамедрасул Абдурагьимова, Зейнаб Азаевади, Тофик Азизханова, Билал Жафарова, Сейфудин Апаева, Амина Эмировади, Эсли Рагьимхановади ва мсб.) шегьердин тIебиатдиз, тамашуниз лайихлу тарихдин чкайриз талукьарнавай шикилриз килигзавайбуру тарих гьиссзавайди ва ватандихъ кIанивал аквазвай.
Мярекатдал рахай Самиля Нажафовади, Айваз Алиханова, Самур Алиева ва масабуру Дербентдин художникри чпин яратмишунралди выставкадиз атайбуруз эсер ийидай, чими гьиссеривди ацIай ажайиб югъ багъишайди къейдна.
Итижлудаказ, вини дережада аваз кьиле фейи мярекат тешкилайди Гьажи Давудан тIварцIихъ галай руьгьдин марифатдин центр я.
Санай масаниз тухузвай выставкадиз вилик квай кьвед-пуд вацра Кьиблепатан Дагъустандин районрин центрайра яшамиш жезвай агьалийризни килигдай мумкинвал жеда.
Къагьриман Ибрагьимов
