Дагъустандин психоневрологиядин диспансердин санитарка, азарлудав регьимсузвилелди эгечIунай къарагъарнавай уголовный делодин сергьятра аваз, кьве вацран къене дустагъ авунва. Идакай ТАСС-диз РД-дин Верховный суддин пресс-секретарь Зарема Мамаевади хабар гана.

Адан гафаралди, ихьтин къарар Махачкъала шегьердин Советский райондин судди акъудна. Шак физвайда вичин тахсир хиве кьуна ва гъил къачун тIалабна.

Силисдин делилралди, 20-июлдиз санитаркади диспансерда авай са азарлу итим чарпайдал кутIунна, адан чинал хъуьцуьган эцигиз-къакъудиз, итимдиз еке азиятар гана. Къейд ийин хьи, азарлуди психикадин рекьяй сагъсузди тир ва адавай вичивай вичиз куьмек гуз, санитаркадин къанунсуз гьерекатрин вилик пад кьаз жезвачир.

И кардикай хабар хьанмазди диспансердиз РД-дин здравоохраненидин министр Татьяна Беляева фена, чкадал ахтармишунар кьиле тухвана. Ада санитаркадин гьерекатар мезземет авуна, чIуру кардиз къанун-къайда хуьдай органрин векилри къимет гудайди хиве кьуна.

Агьмед Магьмудов