Инсандин кьисмет аламатдин затI я. И кар жуьреба-жуьре ксарин уьмуьрдин рекьерихъ галаз мукьувай таниш хьайила, мад сеферда субут жезва.
Мукьвара зун интернетда жуваз герек са малуматдихъ къекъвезвай. Са сайтда зи фикир “Виталий Аликберован аламатдин алемар” тIвар алай макъалади вичел желбна. Автор вуж ятIа къалурнавачир. Макъала 4-5 предложенидикай ва художникдин къелемдикай хкатнавай цIудралди суьретрикай ибарат тир. Малум хьайивал, Виталий Аликберов, Украинада тIвар-ван авай художник, чи ватанэгьли, лезги миллетдин векил яз хьана. Зун интернетда адакай жезмай кьван гзаф делилар кIватIиз алахъна. Бажарагълу ватанэгьлидикай гьатай малуматар газет кIелзавайбурални агакьариз кIанзава.
Виталий Мурсалович Аликберов 1944-йисан 2-сентябрдиз Украинадин Винницкая областдин Цаповка хуьре дидедиз хьана. Гьайиф хьи, адан буба Мурсал Аликберован ери-бине гьи райондай, гьи хуьряй ятIа тайинариз хьанач. И кардиз талукь делилар интернетдани авач. Анжах машгьур художникдикай кхьенвай вири макъалайра ам, миллетдал гьалтайла, лезги яз къалурнава. Винидихъ ихтилат фейи “Виталий Аликберован аламатдин алемар” макъалада лагьайтIа, адан буба — лезги, диде — украинка тирдакай кхьенвай.
ГьикI Мурсал Аликберов Украинадиз акъатнатIа, ана хизан арадал гъанатIа чун патал сир яз амукьзава. Ватандин ЧIехи дяведин йисар тир. Гзафбур а девирда хайи хуьруьвай, кIваливай хьана. Белки, гьадан кьисметни агъурди хьанатIа…
Виталий Аликберован къелемдикай хкатнавай суьретрин арадай заз “Булахдин патав” тIвар алай шикил акуна. Анай дагъдин хуьре булахдал кварар ацIурзавай дишегьлияр, диде къужахламишзавай аял ва дишегьлийрин къаншардиз къвезвай дагъви итим аквазвай. И шикилди адан автор дагъвийрин руьгьдиз, вичин бубайрин хайи чилиз мукьва тирдан гьакъиндай шагьидвалзава.
ГъвечIи чIавалай шикилар чIугунал машгъул хьайи Виталий Аликберова 1976-йисуз Одессада М.Б.Грекован тIварунихъ галай яратмишунрин училище, 1984-йисуз Киевдин яратмишунрин институтдин живописдин факультет акьалтIарна. Хейлин йисара Одессада яратмишунрин училищеда муаллим яз кIвалахна.
Украинадин халкьдин художник, Украинадин художникрин милли Союздин член В.Аликберован суьретрин выставкаяр Москвада, Санкт-Петербургда, Киевда, Одессада, Харьковда кьиле фена. Адан къелемдикай хкатнавай суьретри дуьньядин 17 уьлкведа государстводин ва хсуси коллекцийра чка кьунва. КьетIендиз къейд ийиз кIанзавай кар ам я хьи, чи ватанэгьлидин суьретар гьатнавай коллекцийрин арада Урусатдин, Америкадин, Молдавиядин, Украинадин виликан президентрин — Борис Ельцинан, Билл Клинтонан, Петр Лучинскийдин, Виктор Ющенкодин коллекциярни ава.
Украинадин машгьур художник 2014-йисан 24-майдиз рагьметдиз фена. Инсульт хьайидалай кьулухъ ам садлагьана зайиф хьана. И карди адан яратмишунрин алемдизни таъсирна. Художникдин сухтайрикай сада рикIел хкизвайвал, вишералди суьретар чIугунвай устад вичин уьмуьрдин эхиримжи йисара лап зайиф хьанвай. И делилди адан уьмуьр ва яратмишунрин алем рагъдандиз мукьва хьанвайдакай хабар гузвай.
В.Аликберовахъ галаз санал кIвалахай юлдашри, адан яратмишунрихъ галаз мукьувай таниш ксари ам Аллагьдин патай кьетIен пай ганвай художник тир лугьузва. Дуьз лагьайтIа, ада чIугунвай суьретрихъ галаз мукьувай таниш хьайила, зунни гьахьтин фикирдал атана.
Мегьамед Ибрагьимов
