ЧIехи бубайрин девирра, чи йикъара хьиз, улакьар авачир. А вахтара кьилин улакьар балкIанар, ламар, яцар тир. Гьикьван четин жезвайтIани, зегьметдал рикI алай лежберри абурун куьмекдалди чилерни гьялзавай, техиларни цазвай, санай масанизни физвай. Яцар, балкIанар кутазвай алерар, арабаяр, фургъунар авай.
Малум тирвал, яргъал мензилриз фидайла, арабадин, фургъундин чархарив мукьвал-мукьвал ягъламишдай затIар гуьцIдай. Гиг, чархарин ракьарив гуьцI жез, цIран тийидайвал. Чи йикъара ягъламишдай затIар гзаф ава. Бубайрин девирра лагьайтIа, абур тупIаралди гьисабиз жедай.
И шикилдай квез аквазвайди бубайрин девирра ягъламишдай затIар (запун, чIем ва мсб.) твазвай махсус къаб я. Ам чаз, 2019-йисуз Ичинрин хуьруьз мугьман хьайила, чкадин мискIиндин имам Ариф Рустамован музейдай акуна. Адан гафаралди, ихьтин къапар гамишрин крчарикай ийизвай. Крчарин къен акъудиз, аниз ягъламишдай затIар вегьезвай. Винелай кIарасдикай авунвай кIумп гьалд хъийизвай. И затI датIана арабайрихъ, фургъунрихъ жедай.
Гила абур герек амач. Арабайра, фургъунра аваз яргъал мензилриз касни физмач. Алай аямдин улакьрикай менфят къачузва. Амма чIехи бубайрилай чал агакьнавай ихьтин яржар, безекар квадарна виже къведач. Абур чи тарих я.
Мегьамед Ибрагьимов
