Вахт хъуьтIуьнди я. Им хуьруьн майишатдин карханайрин, лежбервилинни фермервилин майишатрин зегьметчияр, хсуси майишатрин иесияр, арендаторар патал чуьлдин кIвалахрин къизгъин вахтни я. ТIебиатдин шартIарини абуруз багъларани уьзуьмлухра агротехникадин серенжемар кьиле тухудай мумкинвал гузва.
И йикъара чун Эминхуьруьн мулкунал кардик квай КФХ-рин ва арендаторрин кIвачихъ галай ципицIлухрин участокриз фена, анра тухузвай кIвалахрихъ галаз таниш хьана.
Лагьана кIанда, алатай асирдин 90-йисара перестройкадин “азар” галукьна уьзуьмлухар терг авур, мублагь чилер чIурухъан чкайриз элкъвей участокра эхиримжи йисара багълар, уьзуьмлухар, теплицайрин майишатар кухтунва, техилар, салан ва бустандин няметар, истивутар гьасилзава. Хуьруьн мулкуна чIурухъан участокар саки амач, ида гуьгьуьлар шадарзава.
Эминхуьруьнвияр фадлай уьзуьмчивилел машгъул я, гьавиляй хуьруьн мулкарин чIехи пай алай вахтунда ципицIлухри кьунва.
Дагъустан Республикадин хуьруьн майишатдин лайихлу работник Алимирзе Агъамирзоеван, саки 30 йисуз “Аламишинский” совхозда кьилин агрономвиле ва уьзуьмчивилин бригададин бригадирвиле кIвалахай Алимет Алагьвердиеван, Миламудин Мегьамедован, Расим Гьамзатован, Назир Гьамидован участокриз фейила чаз акурвал, хъуьтIуьн и йикъара абур уьзуьмлухра тегьенгрин кьурай ва герек авачир хилер атIунал машгъул я.
— Тегьенгрин кьурай ва герек авачир хилер атIун — им уьзуьмчивиле важиблу серенжемрикай сад я, — лугьузва лежбервилинни фермервилин майишатдин иеси Алимет Алагьвердиева. — И серенжем дуьз ва вахтунда тухвана акьалтIарай участокдин бегьерлувал амайбурулай 30-40 процентдин артух жеда. За жуван кIвачихъ галай 12 гектардин уьзуьмлухрикай 7 гектарда тегьенгар обрезка авунва, и кар давамарни ийизва.
Эминхуьре тежрибалу уьзуьмчийрин кьадар гзаф я, абуруз чпин кIвачихъ галай уьзуьмлухрин гьар са гектардай 80-100 центнер ва адалайни виниз бегьер вахчун адет хьанвай кар я. Алимет Алагьвердиева чаз лагьайвал, и дережа абуру алай йисузни хуьда.
Хазран Кьасумов
